Բանակցություններից հետո մեկնարկեց Կաթողիկոսի և նրա հրաժարականը պահանջող նախաձեռնության անդամների հանդիպումը
Պահանջում ենք Ամենայն Հայոց Կաթողիկոսի հրաժարականը: Այս դիրքորոշմամբ այսօր Կաթողիկոսի հրաժարականը պահանջող նախաձեռնության անդամները եկել էին Կաթողիկոսի հետ հանդիպմանը՝ արձագանքելով նրա հրավերին:
«Նոր Հայաստան, նոր Հայրապետ» նախաձեռնության անդամ Կարեն Պետրոսյանը լրագրողների հետ զրույցում նշեց, որ ընդունել են հանդիպման հրավերը, բայց պայմանով, որ անպայման ուղիղ հեռարձակում լինի:
«Հետո զանգել են տարբեր թեմերի՝ մեր կողմից շատ հարգված եպիսկոպոսներ, խնդրել են, միջնորդել են, որ այդ հանդիպումը փակ լինի, և դա ընդունել ենք: Բայց մեզ համար հասկանալի չէ Մայր Աթոռի երեկվա հաղորդագրությունը, որով ասվում էր, որ հանդիպումը պետք է լինի Կաթողիկոսի և եպիսկոպոսաց դասի հետ, եթե պետք է եպիսկոպոսաց դասը լինի, ապա հանդիպումը պետք է բացառապես ուղիղ հեռարձակմամբ լինի»,-ասաց նա և նշեց, որ հակառակ դեպքում հանդիպում չի եղել:
Երբ Տեր Վահրամը դիմավորում էր նախաձեռնության անդամներին, նրանք իրենց պահանջը ներկայացրին, և Տեր Վահրամը նշեց, որ իրենց չի փոխանցվել, որ միայն պետք է Կաթողիկոսը լինի հանդիպմանը:
«Հիմա հարցը կքննարկվի, և որոշումը կներկայացվի»,-ասաց նա և նշեց, որ եպիսկոպոսների մասնակցության խնդիրը արարողակարգային հարց է, և Վեհափառը երբեք չի հանդիպում առանձին:
Ի վերջո նախաձեռնության անդամների հետ հոգևորականները համաձայնության եկան, որ հանդիպմանը ներկա կլինի միայն 2 եպիսկոպոս, և հանդիպումը կլինի փակ:
«Դա պրոտոկոլ է, մենք էլ հարգում ենք Մայր Աթոռի կարգը, որովհետև մեր խնդիրը Մայր Աթոռի, եկեղեցու դեմ չէ, այլ կոնկրետ անձի, ով այս գահը պետք է ազատի»,-ասաց Կարեն Պետրոսյանը:
Հիշեցնենք, որ «Նոր Հայաստան, նոր Հայրապետ» ազգային-եկեղեցական շարժումը հաղորդագրություն էր տարածվել, ըստ որի՝ Հայ եկեղեցու մի շարք հավատացյալներ, մտահոգ լինելով Հայ Առաքելական Սուրբ Եկեղեցու բարեփոխմամբ, պահանջում են Գարեգին Բ կաթողիկոսի հրաժարումը հայրապետական գահից, ինչպես նաև կաթողիկոսական նոր ընտրությունների անցկացում նոր Հայաստանում:
Հայտնենք նաև հունիսի 6-ին Սուրբ Կաթողիկե և Սուրբ Աննա եկեղեցու բակում մի խումբ քաղաքացիներ, այդ թվում՝ քահանաներ բողոքի ակցիա են անցկացրել, որի ընթացքում պահանջել են Ամենայն Հայոց Կաթողիկոս Գարեգին Բ-ի հրաժարականը:
Այնուհետև Ամենայն Հայոց Կաթողիկոս Գարեգին Երկրորդը Սուրբ Կաթողիկե և Սուրբ Աննա եկեղեցու բակում կայացած ցույցի մասնակիցներին հրավիրել է հունիսի 7-ին այցելել Մայր Աթոռ Սուրբ Էջմիածին և հանդիպում ունենալ իր ու եպիսկոպոսների հետ:
Հայտնենք նաև, որ վարչապետ Նիկոլ Փաշինյանին նամակ էր ուղղել Խորեն վարդապետ Հովհաննիսյանը (Վիրահայոց թեմ), ով անցյալ տարի կարգալույծ էր հռչակվել Ամենայն Հայոց Կաթողիկոս Գարեգին Բ-ի տնօրինությամբ: Հայրապետական տնօրինության համար հիմք էր ծառայել Վիրահայոց թեմի առաջնորդ Գերաշնորհ Տ. Վազգեն եպիսկոպոս Միրզախանյանի գրությունը Տ. Խորեն վարդապետ Հովհաննիսյանի կողմից հոգեւոր ծառայության վայրը ինքնակամ լքելու վերաբերյալ և առ այդ Մայր Աթոռ Ս. Էջմիածնի Կարգապահական հանձնախմբի եզրակացությունը: «Մեր ժողովուրդը արժանի է սիրող հոր, մեր ժողովուրդը արժանի է Հայրապետի, ով վախենում է Աստծուց և ամաչում է մարդկանցից: Մեր ժողովուրդն արժանի է աղոթող Հայրապետի»,-իր նամակում գրել էր հոգևորականը։
Նշենք, որ Գարեգին Բ կաթողիկոսին հրապարակային քննադատություններով տարբեր ժամանակներում հանդես են եկել տարբեր եկեղեցականներ (մեծ մասամբ՝ կարգալույծ): Նրանց թվում են Մեսրոպ արք. Մութաֆյան (Պատրիարք Հայոց Թուրքիո), Նուրհան արք. Մանուկյան (Պատրիարք Հայ Երուսաղեմի), Նորվան արք. Զաքարյան, Տիրան արքեպս. Կյուրեղյան, Խորեն վրդ. Հովհաննիսյան, Գարեգին աբղ. Հարությունյան, Հովհաննես աբղ. Մայիլյան, Հովհաննես աբղ. Սահակյան, Հայրիկ աբղ. Հովհաննիսյան, Եղիա աբղ. Խաչատրյան, Մանուկ քհն. Մնացականյան, Մեսրոպ քհն. Արամյան, Գրիգոր քհն. Ավետիսյան, Հակոբ քհն. Պետրոսյան, Սահակ քհն. Գալստյան, Մխիթար քհն. Սարիբեկյան, Աբել քհն. Մանուկյան, Մարտիրոս քհն. Բերբերյան, Նիկողոս քհն. Հովհաննիսյան, Մովսես քհն. Մանուկյան, Արա սրկ. Նալչաջյան, Ռոբերտ սրկ. Աղազարյան, Ստեփան սրկ. Հովակիմյան: