«Զիբիլիքսի» գործը վերաբացվել է. ՀՔԾ
««Ելք» դաշինքի կողմից իրավապահներին ներկայացրած՝ «Զիբիլիքս» անունով հայտնի քրեական գործը, որը կարճվել է նախորդ տարվա հուլիսին հանցակազմի բացակայության պատճառով, վերաբացվել է:
Այս մասին Tert.am-ի հետ զրույցում ասաց Հատուկ քննչական ծառայության մամուլի քարտուղար Մարինա Օհանջանյանը:
«Նախորդ տարի 2 քրեական գործ էր հարուցվել ՀՀ ՔՕ-ի 154.2 և ՔՕ-ի 149-րդ հոդվածների հատկանիշներով, որն ընդունվել էր մեկ վարույթ: Այնուհետև գործը կարճվել էր հանցակազմի բացակայության հիմքով: 07.06.2018թ.-ին Երևան քաղաքի ընդհանուր իրավասության դատարանի որոշման հիման վրա դատախազի կողմից որոշում է կայացվել քրեական գործով վարույթը կարճելու որոշումը վերացնելու մասին, որն ուղարկվել է ՀՀ հատուկ քննչական ծառայություն` քրեական գործով նախաքննություն կատարելու համար»,- ասաց Օհանջանյանը:
Նա նշեց, որ նախաքննության շրջանակներում մի շարք անձինք կհարցաքննվեն, քննչական ակտիվ գործողությունները շարունակվում են:
Հիշեցնենք, որ Երևանի ավագանու ընտրություններից առաջ «Ելք» դաշինքը իրավապահներին «հանցագործության մասին» հաղորդում էր ներկայացրել: Դաշինքը ներկայացրել էր աղբամաններից գտած թղթեր, որոնք, ըստ դաշինքի անդամների՝ վկայությունն էին այն բանի, որ Երևանի ավագանու մայիսի 14-ի ընտրություններում ՀՀԿ-ի կողմից ընտրակաշառքների բաժանումը կրել է համակարգված բնույթ, պետական մարմինների աշխատակիցները ցուցակներով ձայներ են հավաքել և այլն: