Հավայան կղզիներում Կիլաուեա հրաբխի ժայթքման հետևանքով ոչնչացվել են Պունա շրջանի անտառները (լուսանկարներ)
Օրերս Խաղաղ օվկիանոսում գտնվող Հավայի կղզում (Հավայան կղզիներից խոշորագույնը) Կիլաուեա հրաբխի ժայթքման հետևանքով հազվագյուտ լանդշաֆտներ ու ամբողջական էկոհամակարգեր են ոչնչացվել:
Ինչպես նշում է The Guardian-ը, հրաբխի ժայթքման հետևանքով ամենաշատը տուժել է Պունա շրջանը, որի բնակիչներն ականատես են եղել՝ ինչպես են լավայի հոսանքները ոչնչացնում իրենց բնակավայրերը շրջապատող անտառները:
Պունայի բնակիչների խոսքով՝ օդի բարձր ջերմաստիճանի ու ծծմբի երկօքսիդի բարձր պարունակության հետևանքով պտղատու ծառերը, թփերն ու ծաղիկները սկսել են դեղնել, այնուհետև ընդհանրապես ոչնչացել լավայի մեջ:
«Հրաբխի ժայթքումից առաջ այս տարածքում հավանաբար Հավայիի լավագույն անտառներն էին: Դրանք տարածվում էին մինչև օվկիանոս, ինչը հնարավոր չէ տեսնել կղզու մյուս հատվածներում»,- ասել է Հավայի նահանգի համալսարանի կենսաբանության պրոֆեսոր Պատրիկ Հարտը:
Համալսարանի հրաբխագետ, պրոֆեսոր Ռայան Փերոյի խոսքով էլ՝ սա անսպասելի իրադարձություն չէր:
«Սա շատ հզոր երևույթ էր, սակայն, երկրաբանական տեսանկյունից, անսպասելի իրադարձություն չէր: Հենց այսպես էլ կազմավորվել է Պունան՝ հրաբխային ժայթքումների արդյունքում»,- բացատրել է գիտնականը: