Twitter-ը գովազդային հայտարարություններին առնչվող գործիքակազմ է մշակել
Պաշտոնական հայտարարության համաձայն՝ այդ գործիքակազմը առայժմ կաշխատի միայն ԱՄՆ-ում քաղաքական գովազդների դեպքում, սակայն ապագայում դրա օգնությամբ հնարավոր կլինի ստուգել ցանկացած հայտարարություն: Նշվում է, որ հատուկ ինտերնետային էջում օգտատերերը որոնման գործիքի օգնությամբ կկարողանան գտնել ցանկացած գովազդային թվիթ, ինչպես նաև համապատասխան տեղեկատվություն գովազդատուի մասին:
Եթե խոսքը քաղաքական գովազդի մասին է, ապա տեսանելի են լրացուցիչ տվյալներ՝ ներառյալ գումարի չափը, որը ծախսվել է տեղադրման վրա, ինչպես նաև տեղեկություններ այն մասին, թե որ լսարանն է տվյալ հաղորդագրության թիրախը:
Քաղաքական գովազդների տեղադրման գործընթացը թափանցիկ դարձնելուն ուղղված այս քայլերը հաջորդում են աղմկահարույց բացահայտումներին, ըստ որոնց՝ ԱՄՆ նախագահական վերջին ընտրությունների ընթացքում Ռուսաստանից ամերիկյան լսարանի համար սոցիալական ցանցերում քաղաքական գովազդներ են տեղադրվել: