Հավատում ենք օրենքին, մեր արդարադատությանը. Գլխավոր դատախազության առաջ ակցիան ավարտվեց, ցույցի մասնակիցները վերադարձան Կարբի
Արագածոտնի մարզի Կարբի գյուղի մի քանի տասնյակ բնակիչներ Գլխավոր դատախազության առաջ այսօր բողոքի ակցիա իրականացրին՝ այդպիսով իրենց անհամաձայնությունը հայտնելով նույն գյուղի բնակիչներ Օգսեն և Գուրգեն Նազարեթյաններին կալանավորելու՝ Վերաքննիչ դատարանի որոշմանը։
Կարբեցիները, ովքեր Գլխավոր դատախազություն էին եկել երթով Վերաքննիչ դատարանից, պահանջում են փոխել խափանման միջոց կալանավորումը:
Եղբայրների հայրը Նազարեթյանների փաստաբան Լուսինե Սահակյանի հետ Գլխավոր դատախազությունում բողոք ներկայացրեց խափանման միջոց կալանք ընտրելու որոշման դեմ:
Հանդիպումից հետո Նազարեթյանների հայրն ասաց, որ իրենց խոստացել են հարցը քննության առնել և պարզել հանգամանքները:
«Հավատում ենք օրենքին, մեր արդարադատութանը, որ նաև դատախազությունը կաշխատի, որ օգտակար լինեն և խափանման միջոցը փոխեն: Հիմա վերադառնում ենք Կարբի, սպասում ենք որոշմանը, օր ու ժամկետ չեն նշել, բայց հուսով ենք՝ հնարավորինս շուտ քննեն և ազատ կարձակեն»,- ասաց Նազարեթյանների հայրը:
Փաստաբան Լուսինե Սահակյանը նշեց, որ դատարանը անհիմն որոշում է կայացրել. «Որովհետև ոչ միայն մեղադրանքի հիմքեր չկային, այլ նույնիսկ հիմնավոր կասկած չկար: Նման պայմաններում ընտրել կալանքը որպես խափանման միջոց շատ բաների մասին է խոսում, կփորձենք հասկանալ, թե ինչու այսպես եղավ, ինչու դատարանը նման որոշում կայացրեց: Սահմանված կարգով բողոքներ կներկայացնենք, որպեսզի Օգսեն և Գուրգեն Նազարեթյանները լինեն ազատության մեջ, մինչև քննություն կկատարվի և կպարզվի, որ հիմնավոր չէ մեղադրանքը»,- ասաց նա:
Հիշեցնենք, որ սույն թվականի մայիսի 27-ին միջադեպ է տեղի ունեցել Գուրգեն և Օգսեն Նազարեթյան եղբայրների մասնակցությամբ: Վերջիններս քննվել են Արագածոտնի մարզային վարչության կողմից, սակայն խափանման միջոցը չի ընտրվել կալանավորումը: Դրանից հետո դատախազը բողոքարկել է, որից հետո՝ հունիսի 27-ին, Գուրգեն Նազարեթյանի խափանման միջոցը փոխվել է՝ ընտրվել է կալանավորումը: Երեկ՝ հունիսի 28-ին, փոխվել է նաև մյուս եղբոր՝ Օգսեն Նազարեթյանի խափանման միջոցը: Այժմ երկուսն էլ կալանավորված են:
Նշենք, որ կարբեցիները առավոտից դատարանի դիմաց էին և դատարանի որոշումը պայմանավորում էին քաղաքական պատճառներով: