اروپايي مشران پر مسکو د بندیزونو پر تمدید سلا شول
د شپږو مياشتو لپاره د دغو بنديزونو د تمديد لپاره شين څراغ نن سهار په بروکسل کې د اروپايي ټولنې په سرمشريزه کې ورکړل شوى دى.
دا اوس د اروپايي ټولنې په سفيرانو پورې اړه لري چې په راتلونکو اوونيو کې دغه پرېکړه رسماً تاييد کړي.
د فرانسې ولسمشر ايمانويل مکرون او د جرمني صدراعظمې انګيلاميرکل د مينسک د سولې موافقې د عملي کولو په باب د معلوماتو تر ورکولو وروسته د اروپايي ټولنې له هبرانو وغوښتل پر روسيې د لګول شويو بنديزونو له غزولو سره موافقه وکړي.
د اوکراين په ختيځ کې د اوربند د ټينګښت لپاره د ګڼو هڅو تر څنګ د مينسک د سولې پر موافقه د بېلروس په پلازمېنه کې سلا وشوه.
دغه موافقه د سولې د لارې داسې نقشه پېشنهادوي، چې يوه لوري هم بشپړه نه ده رعايت کړې.
لګول شوي بنديزونه چې د روسيې د بانکدارۍ او انرژۍ سکټورونه په نښه کوي، اول وروسته له هغې په ٢٠١٤م کال کې ولګول شول، چې روسيې په غيرقانوني ډول د اوکراين کريميا ټاپووزمه په خپلې خاورې پورې الحاق کړله او هلته يې د بېلتون غوښتونکو جنګياليو په ملاتړ سره، د شخړې اور ته لمن وهل پيل کړل.