Իտալիայի ծովափերում կեղծ ապրանքների ձեռքբերումը կտուգանվի
Իտալիայի ծովափերում այս ամռանը կարգելվի չարտոնված առևտուրը և կեղծ ապրանքների վաճառքը: Օրենքը խախտելու համար կսահմանվեն լուրջ տուգանքներ, ոչ միայն վաճառողների, այլև հանգստացողների համար, հայտնում է «ՌԻԱ Նովոստի»-ն:
Նախևառաջ, արգելքը կանդրադառնա ծովափերում բազմատեսակ ապրանքներ վաճառող ներգաղթյալ վաճառողների գործունեության վրա: Ինչպես հայտարարել է Իտալիայի ներքին գործերի նախարար Մատեո Սալվինին, նման առևտրականները ոչ միայն վաճառում են կեղծ բրենդներ և խուսափում հարկերից, այլև վնաս են հասցնում օրինական ձեռնարկություններին:
Վաճառողներին սպառնում է 2500-ից 15 500 եվրոյի տուգանք և ապրանքի առգրավում: 7 000 եվրոյի տուգանք է սպառնում զբոսաշրջիկներին, որոնք կգնեն կեղծ ժամացույցներ, ակնոց և վերնաշապիկներ: Տուգանքի չափը կախված է գնած ապրանքի գումարից և քանակից:
Բացի այդ, կտուգանվեն այն զբոսաշրջիկները, որոնք մերսման և դաջվածքների համար կվճարեն ծովափերին աշխատանքի թույլտվություն չունեցող «ձեռնարկատերերին»: