Կանադան պատասխան մաքսատուրքեր է սահմանում ԱՄՆ-ից ներկրվող ապրանքների համար

Կանադան հուլիսի 1-ից պատասխան մաքսատուրքեր կսահմանի ԱՄՆ-ից ներկրվող ապրանքների նկատմամբ: РИА Новости-ի փոխանցմամբ՝ այս մասին հեռուստատեսությամբ հայտարարել է երկրի արտաքին գործերի նախարար Խրիստյա Ֆրիլանդը:

Կանադացի նախարարի խոսքով՝ մաքսատուրքերը կգործեն այնքան ժամանակ, քանի դեռ Դոնալդ Թրամփի վարչակազմը չի չեղարկի Կանադայից ներկրվող պողպատի և ալյումինի համար սահմանված մաքսատուրքը:

Նշվում է, որ Օտտավան օգնություն կցուցաբերի ալյումինի և պողպատի կանադացի արտադրողներին, ինչպես նաև ֆերմերներին: Այդ նպատակի իրականացմանը 2 մլրդ կանադական դոլար կհատկացվի (մոտ 1.5 մլրդ ԱՄՆ դոլար):

Նախարարը նշել է, որ մի շարք ամերիկյան ապրանքների ներկրման համար նոր մաքսատուրքերի տոկոսադրույքը կկազմի 15-25 տոկոս: Ներկրվող ապրանքների ընդհանուր ծավալը, որոնց վրա կտարածվեն նոր մաքսատուրքերը, կկազմի 16.6 մլրդ կանադական դոլար: