Ֆինլանդիայում Պուտինի և Թրամփի հանդիպմանը նվիրված գարեջուր է արտադրվել
Ֆիննական RPS Brewing գարեջրագործարանի թողարկած մուգ գարեջուրը, որը նվիրվել է ՌԴ և ԱՄՆ ղեկավարներ Վլադիմիր Պուտինի և Դոնալդ Թրամփի՝ Հելսինկիում կայանալիք հանդիպմանը, մեծ պահանջարկ է վայելում ֆիննական մայրաքաղաքի խանութներում:
Ինչպես հայտնում է РИА Новости-ն, գարեջուրը թողարկվել է 10 000 շիշ խմբաքանակով, որոնք ներկայանում են հատուկ պիտակով, որում պատկերվում են նախագահների նկարներն ու հետևյալ գրությունը. «Եկ այս խնդիրը լուծենք մեծահասակների պես»:
Ըմպելիքը վաճառքում է հայտնվել խոշոր ցանցային սուպերմարկետներում և ոչ մեծ խանութներում, որոնք գործում են երկրի ողջ տարածքում: Գարեջրի մեկ շշի արժեքը կազմում է 3.49 եվրո:
Հիշեցնենք, որ նախագահների հանդիպումը կայանալու է հուլիսի 16-ին: