Ճապոնիայում շոգի հետևանքով 30 մարդ է մահացել
Ճապոնիայում ավելանում է երկու շաբաթ շարունակվող շոգի հետևանքով (ավելի քան 40 աստիճան՝ ըստ Ցելսիուսի) գրանցվող մահվան դեպքերի թիվը:
Ինչպես փոխանցում է BBC-ն, հուլիսի 21-ին հաղորդվում է մահվան 30 դեպքի մասին: Հազարավոր բնակիչներ բուժօգնության են դիմել: Ճապոնիայի կառավարությունը մարդկանց կոչ է արել հետևել անվտանգության կանոններին:
Այս շաբաթ Ճապոնիայի կենտրոնական շրջաններում 40.7 աստիճան ջերմություն է գրանցվել՝ ըստ Ցելսիուսի, ինչը ռեկորդային բարձր ցուցանիշ է համարվում վերջին 5 տարվա կտրվածքով:
Կիոտոյում ջերմաստիճանը 38 աստիճանից չի նվազել ողջ շաբաթվա ընթացքում: Ինչպես նշվում է, դա առաջին նմանօրինակ դեպքն է 19-րդ դարի վերջերից ի վեր իրականացվող ուսումնասիրությունների ընթացքում:
Երկրի առողջապահության նախարարությունը բնակիչներին խորհուրդ է տալիս բավականաչափ ջուր խմել և խուսափել արևի ճառագայթներից: