"ХIарли-Дэвидсонан" сурсаташна бойкот ян дагахь болчарна тIехIоьттина Трамп
Висконсин штатехь куп тоьхна йолчу "ХIарли - Дэвидсон" компанин векалша хьалхо дIахьедар динера, Евробертана юкъайогIучу пачхьалкхашкахь йохка мотоциклш яр Iамеркера кхечу пачхьалкхашкахь йолчу заводашка дехьадаккха дагахь ду шаьш аьлла. Цу гIулчан Iалашо ю Iамерко оьцучу болатна а, алюминийна а ял яккхар юкъадаккхарна дуьхьал Евроберто кхайкхийначу ял яларна кIелхьаhдовла гIортар.
Компанино бинчу хамца, Iамеркера заводаш дехьа ца яхахь царна эшам хир бу 100 миллион гергга доллар.
Трампана хетарехь, ял яла дезаш хилар бахьана бен дац. Цо чIагIдарехь, и тарифаш юкъаяхале дуьйна яра компани шен заводийн цхьадолу дакъош Таиланде дехьа даха дагахь.
Трампа дийцарехь, цуьнан администраци дийцарш дIахьош ю, шайн заводаш Iамерке сехьа яха лаам болчу кхечу пачхьалкхашкарчу мотоциклш ечу компанешца.