Բողոքի ակցիա Երևանում՝ դատավոր Ալ. Ազարյանի լիազորությունները դադարեցնելու պահանջով (թարմացված, տեսանյութ)
13:55
Գլխավոր դատախազության ներկայացուցչի հեռանալուց հետո ցուցարարները հավաքվեցին կառավարության դիմաց: Նախքան այդ նրանք հավաքվել էին Բարձրագույն դատական խորհրդի դիմաց՝ Վերաքննիչ քրեական դատարանի դատավոր Ալեքսանդր Ազարյանի լիազորությունները կասեցնելու պահանջով ստորագրահավաք անելու նպատակով:
Նույն բովանդակությամբ դիմում կուղարկվի ՀՀ գլխավոր դատախազություն:
«Մեզ պետք չեն դատախազներ ու դատավորներ, որոնք չեն ցանկանում անգամ միջնորդության մասին խոսել»,-հայտարարեց մի երիտասարդ:
«ԵՊՀ Ռեստթարթ» նախաձեռնության անդամ Դավիթ Պետրոսյանը նշեց, որ ՀՀ 2-րդ նախագահ Ռոբերտ Քոչարյանի ասուլիսը տապալելու ակցիան եղել է ինքնաբուխ:
«Քաղաքացիական հասարակությունը, Հայաստանի դատարանները ևս մեկ անգամ ինքնակազմակերպվել են, մենք ցանկանում ենք ցույց տալ, որ հեղափոխության ժամանակ հնչեցված արժեքները, սկզբունքները շարունակում են Հայաստանում մնալ արդիական: Մենք քաղաքացիներով շարունակում ենք դրանք պաշտպանել»,-ասաց Դավիթ Պետրոսյանը:
Նա նկատեց, որ այսօրվա ակցիա նպատակն է ՀՀ նախկին իշխանություններին հիշեցնելն է իր պաշտոնավարման տարիներին կատարվածը:
13:15
Մենք արդեն հայտարարություն տարածել ենք, որ Վերաքննիչ դատարանի որոշումը դեռ չենք ստացել: Մենք մեկ-երկու օրվա ընթացքում այդ որոշումը կստանանք, այդ հարցը կքննարկենք և որոշման մեջ նշված հարցերին համահունչ բողոք կտանենք. քաղաքացիներին ասաց ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության պետ Վահագն Մուրադյանը:
Վահագն Մուրադյանը հրաժարվեց մեկնաբանել ՀՔԾ-ի հայտարարությունն այն մասին, որ Ռոբերտ Քոչարյանի կալանավորումը վերացնելու Վերաքննիչ դատարանի որոշումն ապօրինի է: Մուրադյանը հստակեցրեց, որ ինքը միայն լիազորված է տեղեկացնել, որ գլխավոր դատախազությունը կստանա Վերաքննիչ դատարանի որոշումը, կքննարկի, դրան համահունչ բողոք կներկայացնի:
13:15
Դատախազության ներկայացուցիչը քիչ առաջ դուրս եկավ և ցուցարարներին ասաց, որ սպասում են իրավական գործընթացի, կստանան Վերաքննիչ դատարանի որոշումը, բողոք կներկայացնեն Վճռաբեկ ատյան:
Հարցին՝ արդյո՞ք համաձայն են, որ ազատության մեջ մնալով՝ Ռոբերտ Քոչարյանը կարող է խոչընդոտել նախաքննությանը, դատախազության ներկայացուցիչն ասաց, որ եթե այս կարծիքին չլինեին, ապա չէին մերժի 46 պատգամավորների՝ կալանքը գրավով փոխարինելու երաշխավորությունները:
Հիշեցնենք, որ ցուցարարների պահանջներից մեկն էլ Վերաքննիչ քրեական դատարանի օգոստոսի 13-ի որոշման բողոքարկումն է Վճռաբեկում:
12։28
Ցուցարարները որոշեցին քայլել դեպի Գլխավոր դատախազության շենք։ Գլխավոր դատախազությունից հայտնեցին, որ քիչ հետո դուրս կգա ներկայացուցիչ և կհանդիպի ցուցարարներին:
12։24
«ԵՊՀ ռեստարտ նախաձեռնության» ղեկավար Դավիթ Պետրոսյանը, ով ակցիայի մասնակիցների հետ ներխուժեց Ռոբերտ Քոչարյանի ասուլիսի համար նախատեսված դահլիճ, հանդես եկավ հայտարարությամբ։
«Իշխանությունները Հայաստանում գործում են ըստ Սահմանադրության իրենց լիազորությունների շրջանակում և դրա շրջանակում փորձում են իրականացնել արդարադատություն: Բայց բացի իշխանություններից Հայաստանում կան ազատ, անկախ քաղաքացիներ, ովքեր ամեն վայրկյան կարող են արդարադատության վերականգնման հարցում ունենալ իր մասնակցությունը: Մենք չենք պատրաստվում մեր երկրում հանդուրժել որևէ անարդարություն»,-հայտարարեց Պետրոսյանը:
Նշենք, որ 2-րդ նախագահի մամուլի քարտուղար Վիկտոր Սողոմոնյանը Tert.am-ին ասաց երկրորդ նախագահ Ռոբերտ Քոչարյանի ասուլիսը չի կայանա։.jpg?1534237685536)
12։12
Քիչ առաջ մի խումբ ցուցարարներ ներխուժեցին դահլիճ. նրանք հայտարարում են, որ նպատակը ասուլիսը տապալելն է։ ՀՀ երկրորդ նախագահը դեռ չի ժամանել։ 
13։38
ՀՀ երկրորդ նախագահ Ռոբերտ Քոչարյանն այսօր ասուլիս է հրավիրել «Էրեբունի-Պլազա» բիզնես-կենտրոնում, որի մասին երեկ տեղեկացրել էր նախագահի գրասենյակի ղեկավար Վիկտոր Սողոմոնյանը։
Հիշեցնենք, որ երեկ Վերաքննիչ քրեական դատարանը բավարարեց պաշտպանների բողոքը՝ վերացնելով առաջին ատյանի դատարանի որոշումը Քոչարյանին կալանավորելու վերաբերյալ:
«Չի կարող անձը ենթարկվել քրեական հետապնդման և պատասխանատվության իր պաշտոնավարման և պաշտոնավարումից հետո, եթե նրա գործողությունները բխել են իր կարգավիճակից։ Եթե անձեռնմխելիության հարցն այսպես լուծվեց, ապա մնացած հարցերին դատարանը չպետք է անդրադառնա»,-որոշումի հրապարակումից հետո ասել էր փաստաբան Ռուբեն Սահակյանը։
Ավելի ուշ Հատուկ քննչական ծառայությունից հայտարարել էին, որ ՀՀ վերաքննիչ քրեական դատարանի որոշումը ապօրինի է. «Վերաքննիչ քրեական դատարանը դուրս է եկել իր լիազորությունների շրջանակից: Հույս ունենք, որ դատախազությունը վճռաբեկ բողոք կներկայացնի»։
Հիշեցնենք, որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։
Նույն օրը 2008 թվականի մարտի 1-ից 2-ն ընկած ժամանակահատվածում Երևանում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործով նախաքննության ընթացքում ձեռք բերված ապացույցների բավարար համակցության հիման վրա ՀՀ պաշտոնաթող նախագահ Ռոբերտ Քոչարյանին մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Քոչարյանը հուլիսի 27-ին կալանավորվել էր։