Конгрессо арахецна Оьрсийчоьнна дуьхьал санкцеш чIагIъярх лаьцначу низаман проект
Iамеркан Конгрессан сайта тIехь шинарин дийнахь документ арахецна, Оьрсийчоьнна дуьхьал кхайкхийна сакцеш чIагIъярх лаьцна долу. Иза хьалхо кечдинера Республикан а, Демократин а шина партерчу сенаторша, шайн коьртехь сенатор Грэм Линдси а волуш.
Цу документан цIе ю "Кремлан агрессех Iамеркан кхерамазалла ларъяр" аьлла. Иза кечдинера Iамеркан президент Трамп Доналд Оьрсийчоьнан президентца Путин Владимирца ХIелсинкехь Товбеца-беттан 16-чохь цхьаьнакхеттачул тIаьхьа.
Цу документана тIехь ду политикан дIахьедарш а, ткъа и штта Оьрсийчоьно лелочунна дуьхьал яха езаш йолу гIулчаш йийцар а.
Цу низаман проектана тIехь дуьйцуш ду Оьрсийчоьно ГIирмана аннекси яр Цхьаьнатоьхначу Штаташа къобул деш ца хилар а (1940-чу шарахь Советан Пачхьалкхо Балтера пачхьалкхаш дIалацар къобул деш ца хиларца доьзна кечдина хиллачу документан кепехь).
Цу документо доьхкуш ду Iамеркан администрацина НАТО-на юкъаръялар Iалашонца гIулчаш яхар.
Низаман проектца а догIуш, иза тIеэцна 180 де далале, Iамеркан президенто санкцеш кхайкхо езаш ю "Оьрсийчоьнан президентан лаам чекхбоккхуш коррупцин гIулчаш йохучу политикашна а, олигархашна а, кхин болчу нахана а дуьхьал".
Санкцеш кхайкхо езаш ю иштта цу нехан доьзалхошна а, Путинца йоьзначу вовшахтохараллашна а.
Низам тIеэцна 90 де далале пачхьалкхан секретаро хаам бан безар бу Конгрессе "терроризман спонсор йолу пачхьалкх" олучу критерешца йогIуш ю Оьрсийчоь я яц бохучух лаьцна.
И низаман проект йийцаре маца йийр ю хууш дац. Оьрсийчоьнна санкцеш кхайкхорах лаьцна цул хьалха хилла проект, берш аьлча санна конгрессменаша гIортор а еш, тIеийцира стохка Конгрессан шина а чоьно.