Դատարանների դատարան չի ստեղծվելու, անցումային արդարադատությունը չի հակասելու ՀՀ սահմանադրությանը. Արտակ Զեյնալյան
Արտակարգ դատարաններ չեն ստեղծվելու, անցումային արդարադատությունը չի հակասելու ՀՀ Սահմանադրությանն ու կոնվենցիաներով, միջազգային պայմանագրերով ստանձնած պարտավորություններին:
Այս մասին լրագրողների հետ զրույցում ասաց արդարադատության նախարար Արտակ Զեյնալյանը՝անդրադառնալով Tert.am-ի հարցին՝ արդյոք անցումային արդարադատություն ձևավորելու անհրաժեշտություն կա՞, քանի որ վարչապետի հայտարարությունից հետո հարցի վերաբերյալ մտահոգություններ են հնչել, հայտարարությամբ հանդես էր եկել նաև ՄԻՊ-ը:
«Չեն լուծարվելու դատարանները, դատարանների դատարան չի ստեղծվելու, Սահմանադրությունը չի խախտվելու: Կրկնում եմ՝ սա լինելու է օրինական և կոչված է լինելու մարդու իրավունքները վերականգնելուն»,- վստահեցրեց նա:
Հիշեցնենք, որ օգոստոսի 17-ի հանրահավաքի ժամանակ վարչապետ Նիկոլ Փաշինյանը հայտարարել էր, որ առաջիկայում լուրջ քննարկում են ունենալու անցումային արդարադատության մարմիններ ստեղծելու վերաբերյալ: