NBA-ի բասկետբոլիստների 40%-ը հոգեկան առողջության խնդիր ունի
«Հյուսթոն Ռոկետսի» գլխավոր մարզչի օգնական Ջոն Լուկասը հայտարարել է, որ Բասկետբոլի ազգային ասոցիացիայի (NBA) բասկետբոլիստների ավելի քան 40%-ը հոգեկան առողջության հետ կապված խնդիրներ ունի.
«Սա իսկական համաճարակ է լիգայի համար: Տարատեսակ խնդիրներ կան՝ ուշադրության պակասի պատճառով առաջած հոգեկան խնդիրներից մինչև դեպրեսիաներ: Նման խնդիրներ կարող են առաջանալ նաև ալկոհոլի և թմրանյութերի օգտագործման հետևանքով»,- Ջոն Լուկասի խոսքը մեջբերել է ESPN-ը:
Ջոն Լուկասը նաև նշել է, որ բասկետբոլիստների 5%-ից քիչն է դիմում բժիշկների օգնությանը, իսկ «Հյուսթոնում» երկու բասկետբոլիստ մշտական դեղահաբեր են օգտագործում.
«Հյուսթոնում» հոգեկան առողջության հետ կապված խնդիրներ ունեցող երեք բասկետբոլիստ ունենք, երկուսը դեղահաբեր են օգտագործում: Որոշ օրերի նրանք իրենց լավ են զգում, որոշ օրերի՝ ոչ: Փորձում եմ հնարավորինս շատ աջակցել նրանց՝ չնայած ինքս հոգեբան չեմ»,- ասել է Լուկասը:
Հավելենք, որ Ջոն Լուկասի ներկայացրած տեղեկատվությունը հաստատել է բժիշկ Ուիլյամ Պրահեմը, ով ասոցիացիայում զբաղվում է հենց նման խնդիրների ուսումնասիրությամբ: