Новата рунда преговори за Брегзит заврши без значаен напредок, но со заложби од двете страни за интензивирање на преговорите, порачаа двајцата главни преговарачи, Доминик Рааб и Мишел Барние. Европскиот преговарач, Мишел Барние, појасни дека со оглед на кусото време кое преостанува до датумот за напуштање на Велика Британија, двете страни „постојано“ ќе преговараат. Доколку сакаат да постигнат договор пред напуштањето на Велика Британија, двете страни треба да постигнат заеднички договор до октомври, јавува дописничката на МИА од Брисел. Иако шансите се сѐ помали, ниту Барние, ниту Рааб денеска на прес-конференцијата во Брисел не сакаа да кажат дека е невозможно. Сепак, и двете страни се подготвуваат за сите сценарија, порачаа тие, вклучително и тнр „Брегзит без договор“, односно напуштање на Велика Британија без претходна трговска спогодба и дефиниран однос помеѓу двата блока.
