Заштитениот сведок препозна тројца од обвинетите во „Монструм“
Автомобилот бил со регистерска табличка 822, рече сведокот, и ги опиша лицата кои ги видел.
"Еден беше висок, црн, со лузна, постар, со седа коса, околу 50-годишна возраст, друг келав, со брада, 35-40 години и уште еден со брада. Не изгледаа како да одат на риболов“, рече сведокот.
Тој во судницата ги препозна обвинетите , Агим Исмаиловиќ и Сами Љута. И уште еден кој не е обвинет, но во моментот не е во судницата, за кој рече дека не смее да го посочи од безбедносни причини.
Пред почетокот на судењето судијата, по барање на обвинителката Фатиме Фетаи, образложи дека е почната постапка за екстрадиција на двајца обвинети, Алил Демири и Африм Исмаиловиќ, кои се наоѓаат во Косово.
За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.
Врховниот суд во декември лани ги укина пресудите и ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.