Ասանժը մարդկությանն ազատության կորուստ է կանխատեսում

WikiLeaks սկանդալային կայքի գլխավոր խմբագիր Ջուլիան Ասանժը կարծում է, որ ներկայիս սերունդը համարվում է «վերջին ազատն աշխարհում», քանի որ համաշխարհային ցանցի զարգացմանը զուգընթաց յուրաքանչյուր մարդու տվյալները հայտնի կլինեն պետական կառույցներին: Այդ մասին նա հայտարարել է հարցազրույցում, որը RT-ին են տրամադրել Բարսելոնայում էթիկական տվյալների հարցերով համաշխարհային ֆորումի կազմակերպիչները:

Հարցազրույցից հետո Մեծ Բրիտանիայում Էկվադորի դեսպանատանը, որտեղ արդեն 6 տարի գտնվում է WikiLeaks-ի հիմնադիրը, համացանցն անջատվել է:

Ասանժի խոսքով՝ մոտ ապագայում բոլոր մարդիկ կներառվեն կառավարությունների ու պետական կառույցների տվյալների համաշխարհային բազայում:

«Այս սերունդը, որը ծնվում է հիմա, համարվում է վերջին ազատ սերունդը: Դուք ծնվում եք, և կա՛մ միանգամից, կա՛մ մեկ տարուց դառնում եք հայտնի ամբողջ աշխարհում»,- ասել է նա:

WikiLeaks սկանդալային կայքի գլխավոր խմբագիրը ենթադրել է նաև, որ կիբեռտարածքի միջոցով թշնամական գործողությունների մասշտաբը կտրուկ կաճի, երբ արհեստական բանականությունը սովորի ավտոմատացնել հաքերային հարձակումները:

Ասանժը Լոնդոնում Էկվադորի դեսպանատանն է բնակվում 2012 թվականից: Չնայած, որ Շվեդիայի դատախազությունում հրաժարվել են գործի քննությունից, որի շրջանակներում Ասանժին մեղադրանք է առաջադրվել բռնաբարության համար, բրիտանական ոստիկանությունը հաստատել է նրան ձերբակալելու պատրաստակամությունը դեսպանության տարածքից դուրս գալու դեպքում: Ձերբակալության պարագայում նրան սպառնում է արտահանձնում ԱՄՆ: Վաշինգտոնում կարծում են, որ Ասանժը պետք է դատարանի առաջ կանգնի ԱՄՆ-ի հազարավոր գաղտնի փաստաթղթերը հրապարակելու համար: