افغان ولسمشر محمد اشرف غني تېره شپه له زلمي خلیلزاد سره وکتل
د جمهوري ریاست اعلامیه وايي، ښاغلي خلیلزاد ولسمشر غني ته د افغانستان د سولې لپاره د روانو هڅو په اړه معلومات ورکړل او ویې ویل چې په دې برخه کې به دی بیا یو شمېر هېوادونو ته سفرونه وکړي.
د ارګ اعلامیه وايي، ولسمشر غني د افغانانو په مشرۍ د افغانستان د سولې د پروسې لپاره د زلمي خلیلزاد له هڅو مننه وکړه.
زلمی خلیلزاد د سولې د هڅو په برخه کې په داسې وخت کې دوهم ځل کابل ته راغلی دی چې د جمعې په ورځ په مسکو کې د روسيې په منځګړتوب د سولې د عالي شورا او طالب استازو په ګډون یوه غونډه جوړه شوې وه.