Թրամփն ու Մակրոնը հայտարարել են ՆԱՏՕ-ում Եվրոպայի մասնակցությունն ավելացնելու անհրաժեշտության մասին
«Անարդար է, որ եվրոպական անվտանգությունն այսօր միայն Միացյալ Նահանգներն է ապահովում», - երեկ Փարիզում հայտարարել է Էմանյուել Մակրոնը` Սպիտակ տան ղեկավարի հետ հանդիպմանը:
«Երբ նախագահ Թրամփն ուզում է պաշտպանել Ամերիկայի նահանգներից մեկը, նա Ֆրանսիայից, Գերմանիայից կամ եվրոպական որևէ երկրից ֆինանսավորում չի պահանջում», - հայտարարել է Ֆրանսիայի նախագահը` եվրոպացի գործընկերներին կոչ անելով ավելի մեծ պատասխանատավություն ստանձնել պաշտպանական ոլորտում:
ԱՄՆ նախագահ Դոնալդ Թրամփն իր հերթին՝ ժամանելով Ելիսեյան պալատ, կրկնել է, որ ինքն ուզում է ուժեղ Եվրոպա և ուզում է այս հարցում օգնել եվրոպացի դաշնակիցներին, և ընդգծել` վերջիններս պետք է ավելացնեն իրենց ռազմական ծախսերը` ՆԱՏՕ-ի պահանջներին համապատասխան։
Նշենք, որ Դոնալդ Թրամփը Փարիզում է՝ մասնակցելու առաջին աշխարհամարտի ավարտի հարյուրամյակին նվիրված հանդիսավոր արարողություններին։