«Նորածին Թրամփի» տեսքով փուչիկը հասել է Փարիզ՝ «մասնակցելու» ԱՄՆ նախագահի այցի դեմ բողոքի ցույցին
Փարիզում հազարավոր մարդիկ ծրագրում են բողոքի երթով անցնել մայրաքաղաքի փողոցներով՝ ի նշան բողոքի՝ ընդդեմ ԱՄՆ նախագահ Դոնալդ Թրամփի այցի:
Ինչպես հաղորդում է CNN-ի թղթակիցը, մարդիկ հավաքվել են հրապարակներից մեկում, որտեղից սկսելու են երթը, մինչդեռ հրապարակում երևում է նաև «նորածին Թրամփի» տեսքով փուչիկը, որը Փարիզ է ժամանել անմիջապես Լոնդոնից:
Ցույցի մասնակիցներից մեկի խոսքով՝ բողոքի ակցիան նաև ազդանշան է ուղղված Ֆրանսիայի նախագահ Մակրոնին, որը «չպետք է հրավիրեր Թրամփին՝ մասնակցելու Առաջին աշխարհամարտի ավարտի հարյուրամյակին նվիրված միջոցառումներին»:
Հիշեցնենք, որ նոյեմբերի 10-11-ը Փարիզում տոնական միջոցառումներ են անցկացվում, որոնց մասնակցում է շուրջ 70 երկրի ղեկավար:
Թրամփն այսօր ավելի վաղ արդեն հասցրել է քննադատությունների առիթ տալ՝ որոշելով անձրևի պատճառով չեղարկել այցն ամերիկացի զինծառայողների գերեզմանատուն: