Դավիթ Տոնոյանն այցելել է Աֆղանստանի ռազմաբազայում հայ խաղաղապահների ծառայության ու մարտական հերթապահության վայրեր
Նոյեմբերի 21-ին ՀՀ պաշտպանության նախարարի պաշտոնակատար Դավիթ Տոնոյանը հայկական զորախմբի հրամանատարության ուղեկցությամբ այցելել է ռազմաբազայում հայ խաղաղապահների ծառայության ու մարտական հերթապահության վայրերը։ Դավիթ Տոնոյանը ծանոթացել է առանձին հերթապահության յուրահատկություններին։
Դավիթ Տոնոյանն այցելել է ռազմաբազայի հոսպիտալ, որտեղ ծառայություն է իրականացնում նաև հայ զինվորական բժիշկը։ Վերջում ՀՀ պաշտպանության նախարարի պաշտոնակատար Դավիթ Տոնոյանը հանդիպում է ունեցել ողջ անձնակազմի հետ։
Հանդիպման ընթացքում նախարարը անձնակազմին ներկայացրել է ՀՀ ում ընթացող քաղաքական գործընթացները, ԶՈւ-երի բարեփոխումների կարևոր կետերը։ Քննարկվել է բարեփոխումներում միջազգային համագործակցության կարևորությունը և այդ համատեքստում նման առաքելությունների նշանակությունը։ Զինծառայողները տարբեր հարցեր են բարձրացրել, որոնց անդրադարձել է Դավիթ Տոնոյանը։
Հանդիպման ավարտին նախարարի պաշտոնակատարը իր և երկրի ղեկավարության անունից շնորհակալություն է հայտնել հայ խաղաղապահներին բարձր որակի ծառայության համար։
Ռազմաբազայի հրամանատարությունը նշել էր, որ հայ դիրքապահներին գիշերը ստուգելը խնդրահարույց է։ Դեռ չմոտեցած նրանց միանգամից լսվում է փակաղակի լիցքավորման սաստող ձայնը։