Պատգամավորի թեկնածուներից ովքեր են առաջադրված Արմավիրի մարզում

Արմավիրի մարզն ընդգրկող թիվ 7 ընտրատարածքում արտահերթ ընտրություններին մասնակցող 11 կուսակցությունն առաջադրել է առավել հայտնի ու քիչ հայտնի թեկնածուներ:

Քրիստոնեա-ժողովրդական վերածնունդ կուսակցությունը 6-րդ ընտրատարածքում ունի ռեյտինգային 5 թեկնածու:

Բարգավաճ Հայաստան կուսակցությունը 6-րդ ընտրատարածքում ունի 15 թեկնածու, նրանցից են ԱԺ ԲՀԿ խմբակցության պատգամավոր Արայիկ Աղաբաբյանն ու ՀՀԿ խմբակցության պատգամավոր Նահապետ Գևորգյանի որդին՝ Քաջիկ Գևորգյանը, ով անկուսակցական է, ԲՀԿ անդամ չէ:

ՀՀԿ-ն այս ընտրատարածքում ունի 7 թեկնածու, որոնցից 3-ը չեն աշխատում:

ՀՅԴ-ն առաջադրել է 10 ռեյտինգային թեկնածու, որոնցից մեկը տնտեսական զարգացման և ներդրումների նախկին նախարար, նախկին պատգամավոր Արծվիկ Մինասյանն է:

«Լուսավոր Հայաստանը» ներկայացրել է 15 թեկնածու:

«Մենք» դաշինքը ներկայացրել է 12 ռեյտինգային թեկնածու: Նրանց թվում են Կարմիր Խաչի բուժքույր Գոհար Մրտեյանը, Հայոց հայրենիք կուսակցության նախագահ Անահիտ Եղոյանն ու Վիվառո Բեթինգ ՍՊԸ-ի ռիսկ մենեջեր Հայկ Սարգսյանը:

«Իմ քայլը» դաշինքը ներկայացրել է 14 ռեյտինգային թեկնածու: 6-րդ ընտրատարածքում ներկայացված է միանգամից 3 փոխմարզպետ՝ Արմավիրի փոխմարզպետ Կարեն Գրիգորյանը, Էջմիածնի փոխքաղաքապետ Արսեն Պետրոսյանը, Վայոց Ձորի մարզպետի տեղակալ Ռազմիկ Տոնոյանը: Այստեղ է առաջադրված նաև «Հայաստանի եվրոպական շարժում» ՀԿ նախագահ, Երևանի նախկին ավագանու «Ելք» խմբակցության անդամ Վիկտոր Ենգիբարյանը:

«Ազգային առաջընթաց» կուսակցությունը ներկայացրել է տարբեր մասնագիտություններով թեկնածուների, նրանց թվում են մանկավարժ, ուսուցիչ, գյուղատնտես, դիզայներ, ճարտարագետ:

ՕԵԿ-ը ներկայացրել է 6 թեկնածու:

«Քաղաքացու որոշում» կուսակցությունը ներկայացրել է 5 թեկնածու: Նրանցից Լիլիթ Հարությունյանը քիմիկ-տեխնոլոգ է, թեկնածուներից 2-ը ճարտարագետ են:

Իսկ «Սասնա ծռեր»-ն առաջադրել է 15 ռեյտինգային թեկնածու, որոնցից 9-ը չեն աշխատում: Այս ընտրատարածքում «Սասնա ծռերը» առաջադրել է ազատամարտիկ Վոլոդյա Ավետիսյանին: