ټرمپ د فضايي قوماندانۍ د رامنځ ته کولو امر کړی
ډنالډ ټرمپ د سې شنبې په ورځ د یو سند په لاسلیکولو د امریکا د دفاع وزارت ته دنده ورکړه، څو د فضايي عملیاتو د څارنې او تنظیم لپاره یو نوی مرکز رامنځ ته کړي چې د پرمختللې ټکنالوژۍ په وسیله په چټکه توګه د کارولو وړ وګرځي او په فضا کې د سټلایټونو او مصنوعي سپوږمکیو په شمول د امریکا د ګټو مؤثره دفاع وکړی شي.
دا مرکز د ولسمشر ټرمپ له هغه هدفه چې غواړي یو ځانګړی فضايي ځواک رامنځته کړي جلا ګڼل کېږي، خو ښايي دواړه پروژې په یو لوري حرکت وکړي.
د امریکا مرستیال ولسمشر مایک پنس د سې شنبې په ورځ په فلوریډا کې د کنیډي په فضايي مرکز کې وویل:
"نن په فضا کې د امریکا د ملي امنیت یو نوی پړاو پیل شو."
د پنس په وینا د دې پروژې تمویل به د امریکا د ۲۰۲۰ مالي کال په بودجه کې شامل شي.