«Եղբայրներ և քույրեր, դուք արժանի եք սրան». Ալեքսիս Օհանյանը շնորհավորել է Հայաստանին The Economist-ի կողմից «Տարվա երկիր» ճանաչվելու կապակցությամբ
Ամերիկյան Reddit սոցիալական լրատվական կայքի, Initialized Capital վենչուրային ընկերության հիմնադիր Ալեքսիս Օհանյանն իր պաշտոնական ֆեյսբուքյան էջում շնորհավորել է Հայաստանին՝ հեղինակավոր The Economist պարբերականի կողմից «Տարվա երկիր» ճանաչվելու կապակցությամբ:
«Տարվա երկիր՝ Հայաստան: Եղբայրներ և քույրեր, դուք արժանի եք սրան: Դուք բոլորդ եք դա արել՝ խաղաղ ու հզոր»,-գրել է հայազգի միլիոնատերը՝ նկատի ունենալով տարեսկզբին տեղի ունեցած «թավշյա հեղափոխությունը»:
Հիշեցնենք, որ բրիտանական հեղինակավոր The Economist պարբերականը «Տարվա երկիր» է ճանաչել Հայաստանը:
Հատկանշական է, որ պատվավոր տիտղոսին պարբերականն արժանացնում է ոչ թե ամենահարուստ, ամենաազդեցիկ կամ ամենահամեղ խոհանոցն ունեցող երկրներին ու ժողովուրդներին, այլ հաշվի է առնում անցնող տարվա ընթացքում տվյալ երկրի գրանցած առաջընթացը:
Ո՞ր երկիրն է անցած 12 ամիսների ընթացքում փոխվել դեպի լավը. այս անգամ հեղինակավոր լրատվամիջոցի կարծիքով դա հենց Հայաստանն է:
Ընդգծելով, որ հաղթողի անունը որոշելն իրենց համար բավականին բարդ ընտրություն է՝ The Economist-ը նկատում է, որ տարվա ընթացքում լավ աշխատանքը դեռևս չի երաշխավորում միանշանակ հաջողություն ապագայում: Այդպես, օրինակ, անցյալ տարվա հաղթող Ֆրանսիան այսօր չի հանգստանում զանգվածային ցույցերից ու անկարգություններից, իսկ 2015-ի հաղթող Մյանման վերջերս «արյունալի» հետընթաց ապրեց: