Բրիտանացի գիտնականները կույր ամֆիբիային Թրամփի պատվին են անվանել
Բրիտանացի գիտնականները նոր հայտնաբերված ամֆիբիային, որը կույր է ու գլուխն ավազի մեջ թաղելու սովորություն ունի, ԱՄՆ նախագահ Դոնալդ Թրամփի պատվին են անվանել:
Ինչպես նշում է The Guardian-ը, արարածին անվանել են Dermophis donaldtrumpi: Գիտնականների կարծիքով՝ ԱՄՆ նախագահը նույնպիսի վարք է դրսևորում կլիմայական փոփոխությունների փաստը հերքելու հարցում. «ավազի մեջ է թաղում գլուխը՝ չցանականալով տեսնել իրականությունը»:
Նշվում է, որ փոքր, առանց վերջույթների կենդանին հայտնաբերվել է Պանամայում:
Աղբյուրը նշում է, որ կլիմայական փոփոխություններն ազդում են ամերիկացիների կյանքի որակի վրա. անտառային հրդեհները, ջրհեղեղներն ու նման երևույթները այդ փոփոխությունների հետևանք են, որոնք գնալով ավելի են սրվելու: ԱՄՆ կառավարությունն այս մասին նշել է նոյեմբերին ներկայացրած զեկույցում, սակայն Թրամփն ասել է, որ չի հավատում իր իսկ վարչակազմի ներկայացրած փաստերին: