Ժնևում Սիրիայի հարցով ՌԴ-Իրան-Թուրքիա եռակողմ գագաթնաժողով է սպասվում
Ժնևում մոտ օրերս սիրիական հակամարտության խաղաղ կարգավորման հարցով Ռուսաստանի, Թուրքիայի և Իրանի արտգործնախարարների մակարդակով եռակողմ գագաթնաժողով է սպասվում, գրում է The Guardian-ը:
Նշվում է, որ գագաթնաժողովին կմասնակցի նաև Սիրիայի հարցով ՄԱԿ-ի հատուկ բանագնաց Ստեֆան դե Միստուրան:
Ակնկալվում է, որ գագաթնաժողովի ժամանակ կհայտարարվի Սիրիայի նոր սահմանադրությունը գրելու համար անհրաժեշտ հանձնաժողովի հիմնադրման մասին:
150 հոգուց բաղկացած հանձնաժողովում պետք է ներառվեն թե՛ ընդդիմադիր, թե՛ իշխանամետ ուժեր, ինչպես նաև սիրիացի մտավորականներ ու հասարակական գործիչներ:
Հիշեցնենք, որ հոկտեմբերի 27-ին Ստամբուլում Սիրիայի հարցով գագաթնաժողովի շրջանակում Թուրքիայի, Ֆրանսիայի, Գերմանիայի և Ռուսաստանի առաջնորդները պայմանավորվել էին, որ սահմանադրական հանձնաժողովը կստեղծվի մինչև այս տարվա դեկտեմբերի 31-ը: