2018-ին սպանված լրագրողների թիվը նախորդ տարվա համեմատ գրեթե կրկնապատկվել է. CPJ
2018 թվականին իրենց մասնագիտական գործունեության պատճառով սպանված լրագրողների թիվն աշխարհում երկու անգամ գերազանցել է անցյալ տարվա ցուցանիշը, այս մասին վկայում է Լրագրողների պաշտպանության կոմիտեի (Committee to Protect Journalists) նոր զեկույցը:
Ինչպես փոխանցում է կազմակերպության պաշտոնական կայքը, այս տարի մասնագիտական պարտականությունների կատարման ժամանակ կամ դրանց հետևանքով մահացել է 53 լրագրող, նրանցից 34-ը ծրագրված սպանության զոհ են դարձել:
Ամենաշատ լրագրողները զոհվել են Աֆղանստանում, հիմնականում՝ ահաբեկչական հարձակումների ժամանակ:
Տարվա ամենասկանդալային իրադարձություններից սաուդցի ընդդիմադիր լրագրող Ջամալ Խաշոգջիի սպանությունը շարունակում է մնալ միջազգային հանրության ուշադրության կենտրոնում: The Washington Post-ի թղթակից Խաշոգջիի մարմինը մինչ օրս գտնված չէ:
Հիշեցնենք, որ Ջամալ Խաշոգջին անհետացել էր հոկտեմբերի 2-ին: Նրան վերջին անգամ տեսել էին Ստամբուլում Սաուդյան Արաբիայի գլխավոր հյուպատոսություն մտնելիս:
Ավելի ուշ Սաուդյան թագավորության իշխանությունները հաստատել էին, որ լրագրողը սպանվել է հյուպատոսության աշխատակցի հետ վիճաբանության ժամանակ, սակայն նրանք հերքել են թագավորական ընտանիքի առնչությունը սպանությանը: