“Ўзавтоасаноат” Peugeot Citroen заводи ишга тушмаганини тан олди
Баëнотга кўра¸ “Ўзавтосаноат” АЖ ва “PSA Groupe” компанияси ўртасида Жиззахда автомобиль ишлаб чиқарувчи қўшма корхона ташкил этиш “лойиҳаси амалга оширилмоқда”.
“Ҳозирда объектда қурилиш-монтаж ишлари якунига етмоқда. Технологик ва муҳандислик жиҳозлари етказиб берилиши бўйича тегишли контрактлар тузилган”¸ дейилган расмий хабарда қўшма корхонада нега ҳанузгача “технологик ва муҳандислик жиҳозлари” ўрнатилмаганига изоҳ берилмайди.
17 декабрь куни Озодлик Жиззах эркин индустриал зонаси ҳудудида 10 декабргача ишга топширилиши ваъда қилинган «Uzbekistan Peugeot Citroen Automotive» заводида қурилиш ишларининг тўхтаб қолгани ҳақида хабар берган эди.
Бу жараëнга бевосита алоқадор Жиззах ва Тошкентдаги мулозимлар¸ қурилишнинг пул йўқлигидан тўхтаб қолгани¸ пул йўқлигига эса¸ француз томонининг лойиҳа истиқболига шубҳа билан қараëтгани ортидан ўз сармояси учун муайян кафолатлар талаб қилаëтгани сабаб эканини билдирган эди.
“Ўзавтосаноат” расмий баëнотида¸ аниқ маълумот берилмагани ҳолда¸ Франциянинг PSA Groupe корпорацияси билан музокаралар ҳали ҳам давом этаëтгани эътироф қилинган.
“Бошланғич маълумотлардаги баъзи кўзда тутилмаган ўзгаришлар муносабати билан, шериклар лойиҳа концепциясини ўзгартириш ва иқтисодий параметрларни оптималлаштириш устида ҳамкорликда ишламоқдалар”¸ дейилади “Ўзавтосаноат” баëнотида.
Айни пайтда¸ “Ўзавтосаноат” француз томони лойиҳа концепциясига қандай ўзгартиш киритишни сўрагани ҳақида ҳам изоҳ бермаган.
Озодлик билан бу лойиҳа ҳақида гаплашган “Ўзавтосаноат”нинг шахси очиқланмаслигини истаган мулозими¸ PSA Groupe Ўзбекистонга киритиши кўзда тутилган сармоя ва технологияси учун бир неча юз миллион долларлик молиявий кафолат талаб қилаëтганини айтган эди.
Бу мулозим¸ кафолат масаласи ҳал этилмагунга қадар¸ “французлар Ўзбекистонга бирор жиҳоз ҳам олиб кирмаслигини” таъкидлаган эди.
Лойиҳанинг кечикаëтгани ва томонларнинг “лойиҳа концепциясини ўзгартириш” устида ишлаëтгани ҳақидаги расмий хабардан бу масала ҳанузгача ўз ечимини топмаганини тахмин қилиш мумкин.
Озодлик 19 декабрь куни “Ўзавтосаноат” матбуот хизматига «Uzbekistan Peugeot Citroen Automotive» қўшма корхонасининг ишга туширилиши учун белгиланган янги муддат борми - у қачондан иш бошлайди? деган савол билан мурожаат қилди. Ҳозирча бу саволга ҳам давлат акциядорлик компаниясидан жавоб берилганича йўқ.
2017 йилнинг 16 май куни «Ўзавтосаноат» акциядорлик жамияти Франциянинг «Peugeot Citroen Automobiles S.А» компанияси билан масъулияти чекланган жамият шаклида, устав жамғармаси, эквиваленти 29,3 млн евро миқдоридаги «Uzbekistan Peugeot Citroen Automotive» қўшма корхонасини ташкил этиш тўғрисида битим имзоланганини хабар қилган эди.
Битим имзолангани айтилганидан бир ой ўтиб-ўтмай 2017 йилнинг 13 июнь куни Шавкат Мирзиëев “Хорижий инвестициялар иштирокидаги “ Uzbekistan Peugeot Citroen Automotive” корхонасини ташкил этиш тўғрисида” махсус қарор чиқарган эди.
Қарорда «Жиззах» эркин индустриал зона ҳудудида енгил тижорат автомобилларини ишлаб чиқариш объектларини қуриш учун Ўзавтосаноат»га 45 га ер майдонига эга ер участкасини ажратиш¸ бу заводни қуришга тендерсиз танланган «Avtosanoat-Injiniring» МЧЖ¸ «Ўзоғирсаноатлойиҳа» АЖ¸ «12-трест» МЧЖга “Ўзавтосаноат” билан бир қаторда “қурилиш даврида ишлар ҳажми ва хизматлар бўйича қўшимча қиймат солиғидан озод этиш” каби қатор махсус имтиëзлар берилган эди.
Умумий нархи 133,3 млн еврога тенг деб эълон қилинган бу инвестицион лойиҳа¸ маҳаллий оммавий ахборот воситалари томонидан¸ Марказий Осиëдаги ноëб проект сифатида кўз-кўз қилина бошланди.
Қурилишнинг боришини бир эмас¸ икки марта шахсан ўзи бориб кўрган президент Мирзиëев 2017 йил ноябрида 2018 йилнинг 10 декабридан янги заводдан автомобиллар ишлаб чиқаришни йўлга қўйишни топширган эди.