Rusiye Devlet Duması ekstremizm maddesini qısmen yımşattı

Rusiye Devlet Duması, qanun leyhasınıñ soñki üçünci baquvında Cinaiy Kodeksiniñ 282 maddesiniñ (milletlerara zıddiyet çıqaruv) qısmen yımşatılmasını qabul etti dep bildire Azatlıq Radiosınıñ rus hızmeti.


Tüzetmelerge köre, mahkemeniñ fikrince zıddiyet çıqarğan malümat birinci sefer derc etilse, neticesi - memuriy ceza olacaq, amma ilk seferden soñ bir yıl devamında tekrarlansa - cinaiy ceza. Bunı Rusiye prezidenti Vladimir Putin teklif etti.


Qırımda ilhaqtan soñ rusiye quvetçileri, faalci ve jurnalistlerni ekstremizm maddesinen sebeplenip tutıp ala ve tevfiq ete. 282 maddeni çoqusı allarda içtimaiy ağlardaki layk ve repostlar, internette fikir isbatlav içün qabaatlap qullanalar.


İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.