უნგრელი ოპოზიციონერები აპირებენ საპროტესტო აქციების გაგრძელებას
18 დეკემბერს სულ 200-მდე ადამიანი შეიკრიბა ბუდაპეშტში პარლამენტის შენობასთან გამართულ აქციაზე მაშინ, როცა წინა საღამოს ათასობით დემონსტრანტი იყო მისული სახელმწიფო მაუწყებლის სათავო ოფისთან.
პროტესტის მთავარი მიზეზია შრომის ახალი კანონი, რომელსაც ოპოზიცია „მონობის კანონს“ უწოდებს. 16 დეკემბერს სამართალდამცველებთან შეხლა-შემოხლის შემდეგ საავადმყოფოში მოათავსეს ერთ-ერთი ოპოზიციონერი პარლამენტარი. მემარცხენე-ცენტრისტული პარტიის წევრმა დეპუტატმა ტიმეა საბომ უცხოელ ჟურნალისტებს უთხრა, რომ ოპოზიცია გეგმავს სამოქალაქო დაუმორჩილებლობის აქციებს, პროფკავშირებთან ერთად გზების დაბლოკვას და ახალ დემონსტრაციებს.
ორბანის მემარჯვენე მთავრობა აპრილის არჩევნების შემდეგ ზედიზედ მესამე ვადით მართავს უნგრეთს. პრემიერი ამტკიცებს, რომ შრომის ახალი კანონი ხელს შეუწყობს მუშახელის ნაკლებობის პრობლემის შემსუბუქებას და დასაქმებულებს მისცემს შემოსავლების გაზრდის შესაძლებლობას.