Որևէ տեղ հեշտ չի լինելու, այդ թվում՝ խորհրդարանում. Լ. Մակունցը՝ «Իմ քայլը» խմբակցության ղեկավար լինելու առաջարկն ընդունելու մասին
Սա քաղաքական որոշում է, քաղաքական թիմի որոշում է, առաջարկն էլ հնչեցվել է որոշումների արդյունքում: Սա բարդ է, բայց պետական համակարգում բոլոր ոլորտներում էլ բարդ է, որևէ հեշտ բան չկա:
Այսօր «Իմ քայլը» դաշինքի նիստից հետո լրագրողների հետ ճեպազրույցում հարցին, թե դժվար չի լինելու ղեկավարել բավականին մեծ խմբակցություն, ասաց Մշակույթի նախարարի պաշտոնակատար Լիլիթ Մակունցը, ում թեկնածունն առաջարկվել և վարչության կողմից ընդունվել է խմբակցության ղեկավարի պաշտոնում:
«Որևէ տեղ հեշտ չի լինելու, այդ թվում՝ խորհրդարանում»,-նկատեց նա: Հարցին, թե ժամանակ ասում էր, որ մշակույթն իր մեջ է, ինչպե՞ս է գնում օրենսդիր մարմին, նա արձագանքեց. «Ինչպես այն ժամանակ եմ ասել, հիմա էլ կրկնում եմ՝ մշակույթն ի մեջ է»:
Բացի այդ, նա հավելեց, որ օրենսդիր գործունեությամբ էլ տարբեր ոլորտներում կարող է փոփոխություններ անել:
Ավելի վաղ Tert.am-ը հայտնել էր, որ ԱԺ նախագահի պաշտոնում առաջադրվել է առաջին փոխվարչապետի պաշտոնակատար Արարատ Միրզոյանի, իսկ փոխնախագահների պաշտոնում՝ պատգամավորներ Լենա Նազարյանի և Ալեն Սիմոնյանի թեկնածությունները: