Կոռուպցիոն հանցագործությունների մեջ մեղադրվողները չեն խուսափի պատասխանատվությունից, այդ թվում՝ պաշտոնյաները․ Ս․ Քրմոյան (տեսանյութ)
Կարծում եմ՝ կոռուպցիայի դեմ պայքարում արդեն ունենք լուրջ արդյունքներ ու ձեռքբերումներ. խոսքը վերաբերում է և՛ Կառավարությանը, և՛ իրավապահ համակարգին։
Tert.am-ի հետ զրույցում նման հայտարարություն արեց ՀՀ արդարադատության նախարարի տեղակալ Սուրեն Քրմոյանը։ Նա նկատեց, որ կոռուպցիայի դեմ պայքարը 2 ուղղությամբ է՝ Կառավարությունը քաղաքականության մշակման, կրթության և կոռուպցիայի կանխարգելման ուղղությամբ է աշխատանքներ տանում, իսկ իրավապահ մարմինները հայտնաբերմամբ են զբաղվում։
«Այսօր քաղաքական կամքն է, որն արտահայտվում է ամենաբարձր մակարդակով, նաև ունենք արդյունքներ իրավապահ համակարգում, քանի որ գործնականում տեսնում ենք, որ հարուցվում են բազմաթիվ քրեական գործեր, քննություններ են իրականացվում։ Ունենք նաև այն, որ որևէ պաշտոնական անձ չի կարող խուսափել պատասխանատվությունից, քանի որ կոռուպցիոն հանցագործությունների մեջ ապահովելու ենք նաև պատասխանատվության անխուսափելիություն»,- ասաց Սուրեն Քրմոյանը։
Վերջինս նկատեց, որ նախկինում հասարակությունը հանդուրժողականություն ուներ կոռուպցիոն երևույթների նկատմամբ, իսկ հիմա կա աննախադեպ վստահություն Կառավարության կողմից իրականացվող ծրագրերի և հակակոռուպցիոն քայլերի նկատմամբ։ Ըստ նրա՝ այսօր կոռուպցիայի դեմ պայքարին մասնակցում է ամբողջ հասարակությունը:
Մանրամասները՝ տեսանյութում։