მედია: აშშ ემზადება სირიიდან ჯარების გასაყვანად

აშშ-ის მედიასაშუალებების ცნობით, ქვეყანამ დაიწყო მზადება სირიიდან ჯარების გასაყვანად. სააგენტო „ბლუმბერგის“ ცნობით, ჯარების გაყვანის შესახებ ბრძანება გასცა პრეზიდენტმა დონალდ ტრამპმა.


ხოლო გაზეთი „უოლ სტრიტ ჯორნალი“ იუწყება, რომ ვაშინგტონი აპირებს მთლიანად გაიყვანოს სამხედროები ჩრდილო-აღმოსავლეთ სირიიდან, სადაც აშშ-ის არმია ქურთ მებრძოლებს ეხმარება. ამ რეგიონში იმყოფება 2000-ზე მეტი ამერიკელი ჯარისკაცი.


გასულ კვირაში თურქეთის პრეზიდენტმა რეჯეპ ტაიპ ერდოანმა გამოაცხადა სირიაში ქურთების პოზიციებზე ანკარის იერიშის შესახებ. თურქი ლიდერის განმარტებით, სამხედრო ოპერაცია „ნებისმიერ დროს“ შეიძლება დაიწყოს.