Էրդողան-Ռոհանի բանակցությունների հիմնական թեման Սիրիան էր
Թուրքիայի նախագահ Ռեջեփ Էրդողանի և Իրանի նախագահ Հասան Ռոհանիի բանակցությունների հիմնական թեման Սիրիան էր։
Համատեղ ասուլիսում Էրդողանն՝ ուղղակիորեն չմեկնաբանելով Թրամփի հայտարարությունն, ասել է, թե Թուրքիան և Իրանը կարող են ավելին անել՝ Մերձավոր Արևելքում կայունություն և խաղաղություն ապահովելու համար։
«Շատ քայլեր կան, որ Թուրքիան և Իրանը կարող են միասին կատարել՝ վերջ տալու հակամարտություններին և խաղաղություն հաստատել մեր տարածաշրջանում», - ասել է Էրդողանը։
Ո՛չ նա, ո՛չ Ռոհանին չեն մեկնաբանել Թրամփի որոշումը, բայց երկուսն էլ գովաբանել են Աստանայի բանակցությունների ձևաչափով Ռուսաստանի հետ իրենց համատեղ ջանքերը՝ Սիրիայի հակամարտությանը վերջ տալու համար։
Ինչ վերաբերում է Իրանի նկատմամբ ամերիկյան կոշտ պատժամիջոցներին, ապա Էրդողանը վերահաստատել է Անկարայի դիրքորոշումը, որ Թուրքիան դեմ է ԱՄՆ պատժամիջոցներին։
Թուրքիայի նախագահը նաև ասել է, որ Իրանի հետ ստորագրված միջուկային համաձայնագրից ԱՄՆ-ի դուրս գալը սխալ էր, այն կարող էր սպառնալ տարածաշրջանային անվտանգությանը։
Էրդողանը հայտարարել է, որ ամերիկյան պատժամիջոցների պատճառով չեն պատրաստվում կտրել տնտեսական և առևտրային կապերն Իրանի հետ։
Ռոհանին իր հերթին շնորհակալություն է հայտնել Էրդողանին՝ «ԱՄՆ-ի անարդարացի պատժամիջոցների» հարցում Իրանին աջակցելու համար։
«Ոչ մի երկիր չի կարող քանդել մեր կապերը Թուրքիայի հետ», - ասել է Ռոհանին՝ բարձր գնահատելով Թուրքիայի սկզբունքային դիրքորոշումը տարածաշրջանային հարցերում։
Անդրադառնալով Սիրիային՝ Ռոհանին ասել է, որ երեք երկրների՝ Ռուսաստանի, Իրանի և Թուրքիայի ղեկավարների հաջորդ հանդիպումն անցկացվելու է Ռուսաստանում և սերտ համագործակցությունը շարունակվելու է։
«Սիրիան շատ կարևոր երկիր է մեզ համար, մենք բոլորս կողմ ենք հարգելու Սիրիայի տարածքային ամբողջականությունը և կշարունակենք աշխատել միասին», - ասել է Իրանի նախագահը։
Նրանք մասնակցել են նաև Թուրքիա-Իրան գործարար համաժողովի բացմանը, որտեղ Էրդողանը ելույթ է ունեցել և ասել, թե Ռոհանիի այցը նոր էջ է բացում Թուրքիայի և Իրանի միջև ազատ առևտրի համաձայնագրի ընդլայնման բանակցություններում։