ИМА мехоҳад ҳузури низомияш дар Афғонистонро ду баробар кам кунад

Президенти ИМА Доналд Трамп тасмим дорад, ки бахши қобили мулоҳизаи нерӯҳои амрикоиро аз Афғонистон берун кунад. "Ин қарор қабул шудааст. Хуруҷи нерӯҳо қобили мулоҳиза хоҳад буд",- навишт хабаргузории Франс Пресс рӯзи 21 декабр. Associated Press ва Wall Street Journal  бо такя ба мақомдорони амрикоӣ хабар додаанд, ки то нисфи нерӯи 14 ҳазор нафарии ИМА аз Афғонистон хориҷ хоҳад шуд. 


Рӯзи гузашта вазири дифои ИМА Ҷеймс Матис, ки гуфта мешуд бо президент Трамп дар баъзе масъалаҳо мухолифат дорад, аз мақомаш истеъфо дод.


Рӯзи чоршанбе Трамп эълон кард, ки то ду моҳи дигар нерӯҳои ИМА аз Сурия хориҷ хоҳанд шуд. Ин тасмим ҳам аз трафи шарикони ИМА ва ҳам аз тарафи Конгресс танқид шуд. Гуфта мешавад, ки Матис мухолифи берун кардани нерӯҳо дар марҳалаи феълӣ буд.


Трамп харҷҳои амалиёти низомӣ дар Афғонистонро ҳанӯз пеш аз интихоб шуданаш ба мақоми президент танқид карда буд. Аммо соли 2017 пешниҳод кард, ки теъдоди нерӯҳои ИМА дар он кишвар афзоиш ёбад ва давлатҳои шарик низ ба Афғонистон низ бештар нерӯ фиристанд. Баъди ин,  теъдоди сарбозони ИМА дар Афғонистон аз 11 ба 14 ҳазор афзун шуд. 


Аввали соли 2018 Трамп ҷанг дар Афғонистонро бохташуда номид ва бар сари берун кардани нерӯҳо пофишорӣ кард.  Вале он замон ба Пентагон ва низомиёни баландрутба даст дод, ки ӯро ба зарурати ҳузури нерӯҳо мутақоид кунанд. 


Нерӯҳои ИМА соли 2001 баъди ҳамлаҳои террористии 11 сентябр ба Афғонистон ворид шуданд. Аз он замон ИМА дар хоки ин кишвар дуюним ҳазор сарбозашро аз даст дод ва дар ҷанги 17-сола 900 миллиард доллар харҷ кард.