ԱՄՆ Պաշտպանության նախարարը կհեռանա պաշտոնից
Պենտագոնի ղեկավարը, մասնավորապես, նշել է, որ, իր համոզմամբ, Նահանգները պետք է առավել սերտ համագործակցի դաշնակիցների հետ և առավել խիստ հակազդի Ռուսաստանին ու Չինաստանին, որոնք, Մաթիսի խոսքով, փորձում են աշխարհակարգը ձևափոխել ըստ իրենց բռնապետական պատկերացումների՝ միջամտելով նաև հարևանների գործերին:
«Քանի որ Դուք իրավունք ունեք ունենալ այնպիսի պաշտպանության նախարար, որի հայացքները կիսում եք այս և այլ հարցերում, կարծում եմ, ճիշտ կլինի, որ ես հեռանամ պաշտոնից», - գրել է Մաթիսը Սպիտակ տան ղեկավարին:
Հաղորդվում է, որ Մաթիսը Պենտագոնի ղեկավարի պաշտոնը կթողնի փետրվարի 28-ին:
Արձագանքելով հրաժարականին՝ Դոնալդ Թրամփը Թվիթերում շնորհակալություն է հայտնել Մաթիսին և ընդգծել այն հաջողությունները, որ նա արձանագրել է մինչ օրս:
Մաթիսի որոշումն անակնկալ չէր. նրա մոտալուտ հրաժարականի մասին լուրերը սկսեցին շրջանառվել շաբաթվա սկզբին, երբ նախագահ Թրամփը հայտարարեց, թե դուրս է բերում զորքերը Սիրիայից՝ չնայած Պենտագոնի և դաշնակիցների բազմաթիվ առարկություններին: