თამარ ხულორდავა მისი მანქანის დაზიანების საკითხზე გიგი უგულავას პასუხობს
„ევროპული საქართველოს“ ერთ- ერთმა ლიდერმა გიგი უგულავამ დღეს განაცხადა, რომ ადგილი აქვს შერჩევით სამართალს, რადგან სამართალდამცავებმა არ მოახდინეს იმ მამაკაცის იდენტიფიცირება, რომელმაც 16 დეკემბერს თამარ ხულორდავას ავტომანქანა დააზიანა, მისი ინფორმაციით, ოპოზიციის აქციებზე ხელისუფლება პროვოკატორ ადამიანს გზავნის და სწორედ აღნიშნული ადამიანის გამო ჩაიმსხვრა თამარ ხულორდავას მანქანის მინა თელავში.
„ქართული ოცნების“ წარმომადგენელთა მტკიცებით კი ეს ადამიანი გაერთიანებული ოპოზიციის მხარდამჭერია.
თამარ ხულორდავას თქმით, მისთვისაც საინტერესოა და დეტალურად მოისმენდა შინაგან საქმეთა მინისტრის გიორგი გახარიასგან აღნიშნულ ფაქტზე ინფორმაციას.
„მეც ძალიან მაინტერესებს ეს მამაკაცი ვინ იყო, ის ძალიან დიდი აგრესიით გამოირჩეოდა იმ ჯგუფში, რომელთანაც თელავში მომიწია შეხება ინცინდენტის დროს. ეს ყველაფერი ხდებოდა ჩართული კამერების წინ და არ მგონია, რომ სირთულე იყოს პიროვნების დადგენა. შინაგან საქმეთა მინისტრი ალბათ დღეს ყველაფერზე გაგვცემს პასუხს. გამოძიება იმ დღესვე დაიწყო, შედგა ოქმი“- განაცხადა თამარ ხულორდავამ.