ԱՄՆ ռազմածովային ուժերի ավիակիրը վերջին 8 ամսում առաջին անգամ մտել է Պարսից ծոց

ԱՄՆ ռազմածովային ուժերի ավիակիր նավերի հարվածային խումբը՝ «Ջոն Սթենիս» միջուկային ավիակրի գլխավորությամբ, անցնելով Հորմուզի նեղուցը, մտել է Պարսից ծոցի ջրային տարածք:

Ինչպես հաղորդում է INTERFAX.RU-ն, սա վերջին 8 ամսվա ընթացքում առաջին դեպքն է, երբ ամերիկյան ավիակիրը մուտք է գործում Պարսից ծոց:

Միևնույն ժամանակ հաղորդվում է, որ իրանական իշխանություններն ուրբաթ նախազգուշացրել են Հորմուզի նեղուցի փակման հավանականության մասին, որով փոխադրվում է արդյունահանվող նավթի համաշխարհային ծավալի մեկ երրորդը:

Ամերիկյան ավիակիր նավերի խմբի երթևեկությանը հետևել են Իրանի իսլամական հեղափոխության պահակախմբի կորպուսի նավերը, ինչպես նաև իրանական անօդաչուները: