Dekabr 24-ünde Rostov mahkemesi Bağçasaray “Hizb ut-Tahrir davası” boyunca qararını çıqaracaq

Dekabr 24-ünde bazarertesi künü Rostov-na-Donu şeerinde Şimaliy Kavkaz bölge arbiy mahkemesinde Bağçasaray “Hizb ut-Tahrir davası”nıñ dört iştirakçisi - Remzi Memetov, Ruslan Abiltarov, Enver Mamutov ve Zevri Abseitovniñ davası boyunca mahkeme qararını çıqaracaq.


Bu aqta “Qırım birdemligi” öz Facebook saifesinde haber etti.


“Bu insanlarnıñ terrorcılıqqa iç bir alâqası yoq. Dava malümatında olarnıñ qabaatını tasdıqlağan iç bir mantıqlı delil yoq. Bütün isbatlar “ekspertizalar” ve “gizli şaatlar“ğa esaslanğan. Tış ekimi, aşçı, qurucı ve iş adamı iç bir memumiy ya da cinaiy qanun bozuvını yapmadı. Bugün olar areketleri içün degil, dini içün apisteler”, - dep yazılğan beyanatta.




Rostov-na-Donu şeerinde Şimaliy Kavkaz bölge arbiy mahkemesinde “Hizb ut-Tahrir davası”nıñ ekinci Bağçasaray taqımınıñ mabüsleri soñki söznen mahkemede çıqışta bulundı. Sönki sözde dava iştirakçilerinden iç birisi öz qabaatını tanımadı ve cinaiy davanıñ “siyasiy sebepli hususiyet” bar olğanını qayd etti.




2016 senesi mayıs 12-de Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov yaqalanıp, terrorizmde qabaatlandı. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinden şübheli sayalar.


2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.