ԱԳ նախարարը Հայաստան այցելելու պաշտոնական հրավեր է հղել Սուրբ Աթոռի պետությունների հետ հարաբերությունների քարտուղարին
Սուրբ Աթոռում ՀՀ դեսպան Կարեն Նազարյանը փետրվարի 18-ին հանդիպել է Սուրբ Աթոռի պետությունների հետ հարաբերությունների քարտուղար Ն․Գ․ Փոլ Ռիչարդ Գալագերին (H.E. Mgrs. Paul Richard Gallagher)։
Ինչպես «Արմենպրես»-ին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից, հանդիպմանը Կարեն Նազարյանը ներկայացրել է Հայաստանի և Սուրբ Աթոռի միջև միջպետական հարաբերությունների զարգացման օրակարգը և այս ուղղությամբ առաջիկայում իրականացվելիք քայլերն ու նախաձեռնությունները։
Դեսպանը Վատիկանի բարձրաստիճան ներկայացուցչին փոխանցել է Հայաստան այցելելու արտգործնախարար Զոհրաբ Մնացականյանի պաշտոնական հրավերը։
Տարածաշրջանային զարգացումների լույսի ներքո զրուցակիցներն անդրադարձ են կատարել իրենց մոտեցումներին և առաջնայնություններին։