Ազնավուրի 95-ամյակին ընդառաջ Փարիզում հուշատախտակ է բացվել մեծանուն շանսոնյեի պատվին (լուսանկարներ)
Աշխարհահռչակ շանսոնյե Շառլ Ազնավուրի 95-ամյակի առթիվ Ֆրանսիայի մայրաքաղաքում երեքշաբթի հուշատախտակ է տեղադրվել՝ նվիրված մեծանուն ֆրանսահային:
Ինչպես տեղեկացնում է «Ազնավուր» հիմնադրամի ֆեյսբուքյան էջում տեղադրված հաղորդագրությունը, հուշատախտակը բացվել է Փարիզի 6-րդ շրջանի Մսյո լե Պրենս հասցեում, որտեղ բնակվել է Ազնավուրյանների ընտանիքը ֆրանսիական քաղաք տեղափոխվելուց հետո և որտեղ անցել է Ազնավուրի մանկությունը:
Հուշատախտակի բացման արարողությանը ներկա են գտնվել Փարիզի քաղաքապետ Անն Իդալգոն, Ազնավուրի որդին և հիմնադրամի համահիմնադիր Նիկոլա Ազնավուրը և նրա կինը՝ Քրիստինա Ազնավուրը, որը հիմնադրամի գործադիր տնօրենն է:
Բացի այդ, հաղորդվում է՝ Փարիզի քաղաքապետարանը մայիսի 21-ին մի շարք միջոցառումներ է նախատեսում անցկացնել՝ շանսոնյեի 95-ամյակին ընդառաջ: