Թրամփը վերջին պահին չեղարկել է Իրանի դեմ ռազմական գործողությունը. The New York Times
Ըստ հրապարակման, ռմբակոծիչներն արդեն գտնվել են օդում, ռազմանավերը դիրքավորվել են հարվածներ հասցնելու համար, սակայն վերջին պահին գործողությունը դադարեցնելու հրաման է ստացվել:
Իրանի մի շարք թիրախներ, այդ թվում՝ հրթիռային համակարգերի կայանները պետք է հարվածների տակ ընկնեին այսօր առավոտյան:
Պենտագոնի աղբյուրները Associated Press գործակալությանը հաստատել են, որ ԱՄՆ-ն պատրաստվել է հարվածել Իրանին, բայց գրոհից քիչ առաջ ռազմական գործողությունը դադարեցվել է:
Դա պետք է լիներ ամերիկյան անօդաչու թռչող սարքը Իրանի կողմից խոցելու պատասխանը: Վաշինգտոնը պնդում է, որ Հորմուզի նեղուցի վրա հետախուզական դրոնը խոցվել է օդային չեզոք գոտում:
Իրանի արտգործնախարարությունն այսօր հայտարարել է, թե անհերքելի ապացույցներ ունեն, որ ամերիկյան դրոնը խախտել է Իրանի օդային տարածքը: