ԱՄՆ-ն Թուրքիայի նկատմամբ պատժամիջոցների մասին կհայտարարի հաջորդ շաբաթ. Bloomberg
Bloomberg գործակալությունը տեղեկացրել է, որ ԱՄՆ-ն Թուրքիայի նկատմամբ պատժամիջոցների մասին կհայտարարի հաջորդ շաբաթվա ընթացքում: Թուրքական կողմը, չնայած Միացյալ Նահանգների զգուշացումներին, ձեռք է բերել ռուսական C-400 զենիթահրթիռային համակարգերը: Այս մասին հայտնում է РИА Новости-ն:
Հիշեցնենք, որ հուլիսի 12-ին ռուսական C-400 համակարգերի առաջին խմբաքանակը հանձնվել էր Անկարային: ԱՄՆ մի խումբ սենատորներ կոչ են արել նախագահ Դոնալդ Թրամփին պատժամիջոցներ սահմանել Թուրքիայի նկատմամբ` ռուսական C-400-ների մատակարարման մեկնարկի առնչությամբ:
Ավելի վաղ Թուրքիայի պաշտպանության նախարար Հուլուսի Աքարը նշել էր, որ C-400 համակարգերի ձեռքբերումը ոչ թե նախապատվություն էր, այլ անհրաժեշտություն, քանի որ օդային պաշտպանության տեսանկյունից Թուրքիան խոցելի է: