Իրանը պատրաստ է աջակցել Սիրիային երկրից ԱՄՆ զորքերի դուրսբերման հարցում. իրանցի պաշտոնյա
Պաշտոնական Թեհրանն ակնկալում է, որ ամերիկյան զորքերը շուտով կլքեն Սիրիան, և պատրաստ է Դամասկոսին օգնել Սիրիայի Արաբական Հանրապետությունում ապօրինի գտնվող ԱՄՆ զորքերին դուրս բերելու հարցում, եթե սիրիական իշխանություններն այդ հարցում դիմեն իրենց:
Այս մասին RT Arabic հեռուստաալիքին տված հարցազրույցում խոսել է Իրանի գերագույն առաջնորդի խորհրդական Ալի Աքբար Վելայաթին, ընդգծելով, որ Միացյալ Նահանգները գողանում է սիրիական նավթը, իսկ ԱՄՆ նախագահ Դոնալդ Թրամփը «թալանում է» սիրիացի ժողովրդին: Միևնույն ժամանակ, Վելայաթին Սպիտակ տան առաջնորդին «միջազգային գող» է անվանել:
«Մենք հույս ունենք, որ մոտ ժամանակներս սիրիական մի շարք շրջաններում ամերիկացիների ապօրինի վերահսկողությունը կվերանա, իսկ սիրիացիները կպատասխանեն և այդ հսկողության ավարտը կտան»,- ասել է նա:
Վելայաթին հավելել է, որ Իրանը «իր հնարավորությունների սահմաններում» պատրաստ է «Սիրիայից ամերիկյան զորքերի դուրսբերման հարցում օգնություն տրամադրել», եթե Դամասկոսն այդ հարցով դիմի Թեհրանին:
Հիշեցնենք, որ Սիրիայից ամերիկյան զորքերի դուրսբերման մասին խոսակցությունները շրջանառվում են դեռ նախորդ տարվանից: