Ҷасади 50 шаҳрванди Тоҷикистонро ба Душанбе оварданд

Вазорати корҳои хориҷии Тоҷикистон эълон кард, ки 50 ҷасади муҳоҷирони тоҷикро аз Русия оварда, ба пайвандонашон доданд.  Дафтари матбуоти вазорат рӯзи 21-уми июн хабар дод, ки мошини махсус бо ҷасади шаҳрвандони Тоҷикистон, ки дар қаламрави Русия ҷон бохтаанд, рӯзи 20-уми июн ба Душанбе расид.


Мошини яхдондор рӯзи 16-уми июн ба самти Тоҷикистон ҳаракат карда буд. Вазорат гуфтааст, интиқоли ҷасадҳо бо кӯмаки як тоҷики саховатпеша ва мусоидати мақомоти Русия ва Қазоқистону Қирғизистон имконпазир шудааст. Бо хуруҷи бемории СОVID-19 аксарияти кишварҳои ҷаҳон аз ҷумла Тоҷикистону Русия роҳҳои заминӣ ва ҳавоиро бастанд.


Дар замони пандемия даҳҳо шаҳрванди Тоҷикистон дар Русия ба сабабҳои гуногун ҷон бохтанд ва интиқоли ҷасади онҳо имконнопазир шуд. Айни замон муҳоҷирони тоҷик видеоҳои зиёдеро ҳам дар шабакаҳои иҷтимоӣ нашр карда ва нақл мекунанд, ки фалонӣ аз Тоҷикистон фавтид ва азбаски роҳҳо баста аст, ӯро дар оромгоҳе дар Русия дафн карданд.