Բրազիլիայում «Քովիդ-19»-ից մահացածների թիվը գերազանցել է 50 000-ը. վիրուսի տարածման բարձր ցուցանիշ է արձանագրվել նաև մի քանի այլ լատինամերիկյան երկրներում
Բրազիլիայում «Քովիդ-19» կորոնավիրուսի հետևանքով մահացածների թիվը հատել է 50 հազարի շեմը: Ինչպես վկայում են worldometers.info կայքի՝ պարբերաբար թարմացվող տվյալները, հունիսի 21-ի դրությամբ լատինամերիկյան երկրում հիվանդությանը զոհ է գնացել 50 058 մարդ:
Համաճարակի բռնկման պահից ի վեր երկրում կորոնավիրոսով վարակման 1 070 139 դեպք է արձանագրվել, որից ավելի քան 31 հազարը՝ հունիսի 20-ին: Ընդհանուր ապաքինվածների թիվը կազմում է 543 186 մարդ: Ավելի քան 212.5 մլն բնակչություն ունեցող երկրում մինչ օրս 2 409 830 թեստավորում է կատարվել:
Կորոնավիրուսով վարակման դեպքերի զգալի աճ է նկատվում նաև մի քանի այլ լատինամերիկյան երկրներում, ինչպես օրինակ՝ Չիլիում, որտեղ վերջին մեկ օրում 5355 նոր դեպք է բացահայտվել՝ ընդհանուր ցուցանիշը հասցնելով 236 748-ի: Այստեղ մահացության ընդհանուր ցուցանիշը հասել է 4295-ի:
Իրավիճակը բարդանում է նաև Պերուում, որտեղ վարակվել է 251 338 մարդ, մահացել՝ 7961-ը: Մյուս լատինամերիկյան երկիրը, որտեղ հիվանդությունն արագ տեմպերով է տարածվում, Մեքսիկան է: Այստեղ կորոնավիրուսից մահացության ցուցանիշը կազմում է 20 781 մարդ, վարակվածներինը՝ 175 202: