«Մարտերի ընթացքում Ադրբեջանը կորցրել էր իր կարևոր խաղաքարտերից մեկը՝ անսպասելիության գործոնը…». ռազմական վերլուծաբան
«Չեմ կարծում, որ սահմանային ներկա հարաբերական անդորրը միջազգային գործոնով է պայմանավորված»,- ԳԱԼԱ-ի հետ զրույցում կարծիք հայտնեց «Ռազմինֆո» կայքի ռազմական վերլուծաբան Հայկ Խաչիկյանը՝ անդրադառնալով հայ-ադրբեջանական սահմանի իրավիճակին:
Ըստ նրա՝ հուլիսյան իրադարձությունների ընթացքում իրավիճակը կարող էր երկու ձևով զարգանալ:
«Կամ ադրբեջանական կողմը, ունենալով իր դեմքը փրկելու խնդիր, պետք է գնար ավելի մեծ էսկալացիայի, այսինքն ավելի մեծ ուժերի ներգրավմամբ բախումների, որը տեղային պատերազմից կվերածվեր սահմանի ամբողջ երկայնքով պատերազմի, կամ պետք է լիներ այն, ինչ հիմա եղավ, որովհետև նույն մակարդակում, նույն լարվածությամբ մարտերի շարունակումն իրատեսական չէ:
Մարտերի ընթացքում Ադրբեջանը կորցրել էր իր կարևոր խաղաքարտերից մեկը՝ անսպասելիության գործոնը, և բացի դրանից նրանք կրել էին կորուստներ, և նրանց էլ էր ժամանակ պետք այդ ամենը հարթելու համար»:
Անդրադառնալով թուրք-ադրբեջանական համատեղ զորավարժությունների հիմնական ուղերձին` վերլուծաբանը հայտարարեց. «Զորավարժություններն ընթանում էին երկու ֆորմատով՝ երկու երկրների համատեղ ռազմաօդային և ցամաքային զորքերի: Զորավարժությունների այդ երկու կոմպոնենտներն այնպես չէ, որ նորություն էին:
Նախորդ տարիներին նման վարժանքներ ևս արել էին, տարբերություն չկար: Ասեմ ավելին, զորավարժություններն անցկացվում էին նույն տեղում, նույն ստորաբաժանումների կազմով, ինչ նախորդ տարիներին: Ցամաքային զորավարժություններն անցկացվում էին Բաքվի մերձակայքում գտնվող զորավարժարանում, որտեղ ներգրավված էին մեկ գումարտակի չափով ստորաբաժանումներ Թուրքիայից»,- ընդգծեց Խաչիկյանը:
Ըստ նրա՝ ի տարբերություն նախորդ զորավարժությունների, այս զորավարժության մեջ քաղաքական քարոզչության ֆոնն էր բարձր:
«Ստացվեց այնպես, որ զորավարժությունները հաջորդեցին հուլիսյան բախումներին և նաև այդ բախումների ժամանակ Թուրքիայի ագրեսիվ արձագանքներին: Այս առումով նրանք փորձեցին այդ հանգամանքն օգտագործել: Եղան փոխադարձ այցեր. Թուրքիայից ներկայացուցչական պատվիրակություն գնաց Ադրբեջան, որոնց կազմում էին պաշտպանության նախարարը, գլխավոր շտաբի պետը, Թուրքիայի առանձին զորքերի հրամանատարներ: Մեծ հաշվով նման մասշտաբի զորավարժության ժամանակ նման մարդկանց առկայությունն այնքան էլ համաչափ չէ: Դա խոսում է քաղաքական ուղերձների մասին»:
Արդյո՞ք Ադրբեջանի նախագահին անհանգստացնում է հայ-ադրբեջանական հակամարտության մեջ Ռուսաստանի դերակատարությունը՝ հաշվի առնելով ադրբեջանական կողմի նախաձեռնությամբ տեղի ունեցած Ալիև — Պուտին հեռախոսազրույցները:
Հարցին Հայկ Խաչիկյանն արձագանքեց. «Հուլիսյան բուն ռազմական գործողությունների օրերին ադրբեջանական պատվիրակությունը մեկնում է Թուրքիա և այնտեղ մոտ 4 օր բանակցություններ են տանում, հանդիպումներ են կազմակերպում տարբեր գերատեսչությունների հետ, և բնականաբար պետք է հասկանալ, որ դա չպետք է դուր գար Ռուսաստանին, և Ադրբեջանն իր նախաձեռնողականությամբ փորձում է բալանսը պահել»:
Անահիտ Չալիկյան
The post «Մարտերի ընթացքում Ադրբեջանը կորցրել էր իր կարևոր խաղաքարտերից մեկը՝ անսպասելիության գործոնը…». ռազմական վերլուծաբան appeared first on ԳԱԼԱ.