د سعودي عربستان پاچا د جي شل سرمشریزه پرانیستله

د سعودي عربستان پاچا، شاه سلمان د شلو لویو اقتصاد لرونکو هېوادونو یا (G-20) ډلې سرمشریزه د کرونا وبا له کبله پر اوښتي اقتصادي او ټولنیز زیان په خبرو سره پرانېستله.


شاه سلمان په ریاض کې د دوه ورځنۍ سرمشریزې په پرانېستونکې وینا کې ژمنه وکړه چې دغه ډله به  پر دغې ستونزې د غلبې لپاره د نړیوالې همکارۍ له لارې تر خپله وسه هره هڅه وکړي.


د سعودي پاچا د G-20 له رهبرانو غوښتنه وکړه چې د دې بحران له کبله د اوښتو زیانونو مخه ونیسي، دغه راز د خلکو ژوند خوندي کړي.


په کرونا وېروس په نړۍ کې تر یو میلیون او درې لکه اتیا زرو ډېر کسان مړه شوي دي.


د G-20 ډلې غړي هېوادونه د نړۍ د اقتصادي تولیداتو ۸۵ فیصده برخه او د نړیوال تجارت درې پر څلورمه برخه جوړوي.