هند نوې ډېلي کې د پاکستان شارژدافیر احضار کړ
نوې ډېلي وايي، د لانجمن کشمیر د پولې په اوږدو کې یې تېره اوونۍ د جیش محمد ډلې د افراطي وسله والو د یوې لویې حملې مخه نیولې ده.
د هندوستان د بهرنیو چارو وزارت پرون شنبه په نوې ډېلي کې د پاکستان شارژدافیر ته خپل رسمي اعتراض وسپاره.
د وزارت په حواله "هند خپله پخوانۍ غوښتنه تکرار کړه چې د پاکستان د نړیوالو تعهداتو پرځای کوول وو، هغه دا چې پاکستان دې تر خپلې ولکې لاندې له قلمرو څخه د هند پرضد د تروریستي اعمالو لپاره کار نه اخلي."
د هندوستان صدراعظم نریندرا مودي تېره جمعه ویلي وو، د هند له امنیتي ځواکونو سره په وسلواله نښته کې د جیش محمد د څلورو پاکستاني جګړه مارو وژل کېدل، دا جوتوي چې دغو جګړه مارو غوښتل په کشمیر کې یوه لویه وحشیانه او ورانوونکې حمله وکړي.
د پاکستان د بهرنیو چارو وزارت د نریندرا مودي ادعا رد کړې او بې اساسه یې بللې ده.
دغه وزارت په یوه اعلامیه کې ویلي: "پاکستان دا موارد د هندوستان مایوسوونکې هڅه ګڼي چې غواړي تر خپلې ولکې لاندې کشمیر کې له دولتي ټرورېزم او د پاکستان پرضد د ټروریزم له مالي ملاتړ څخه د نړیوالو پام بلې خوا ته واړوي."
د ښاغلي مودي په خبره دا تحولات په داسې حال کې راځي چې په پام کې ده، په کشمیر کې محلي ټاکنې وشي.
هندوستان غواړي چې د نو,مبر میاشتې تر وروستیو پورې تر خپلې ولکې لاندې کشمیر کې د ولسوالیو په سطحه ټاکنې وکړي.
هندي چارواکو دغه راز ویلي چې له وژل شویو جګړه مارو د وسلو او مهماتو یوه لویه زېرمه هم ترلاسه شوې ده.
په اټمي وسلو د سمبالو دوو سیمه ییزو رقیبانو هندوستان او پاکستان ترمنځ کړکېچ وروسته له هغې لا زیات شو چې په تېره اګسټ میاشت کې د نریندرا مودي حکومت تر خپلې ولکې لاندې د کشمیر چې اکثریت اوسېدونکي یې مسلمانان دي، د کورواکۍ حیثیت ختم کړ.
کشمیر پر دوو برخو وېشل شوې چې یوه برخه یې د پاکستان او بله د هندوستان په ولکه کې ده، خو دواړه هېوادونه د دې سیمې پر بشپړ مالکیت دعوه لري.